Read Ngaju YOB 32 Bible Online

YOB 32 - Ngaju bible

YOB 32

¹Awi Yob percaya toto dengan kabujur ayue, maka katatelo sobate te dia maku tombah auhe tinai.

²Tapi intu hete aton ije biti oloh je bagare Elihu anak Barakheel, ije biti turonan Bus bara jalahan Ram. Ie dia olih manahan kasangite, awi Yob mambujur arepe kabuat tuntang manyalan Hatalla.

³Ie kea sangit dengan katatelo sobat Yob te awi ewen dia olih mambantah kare auh Yob, aloh ewen manyalan ie.

⁴Elihu oloh je pangkatabela bara ewen, awi te ie mentai sampai uras ewen lepah bapander.

⁵Limbah ie mite ewen telo te dia olih tombah, ie sangit,

⁶tuntang hamauh kalotoh, “Aku magon tabela, sadang keton jari bakas, awi te aku ragu-ragu mansanan angat tirok ayungku.

⁷Tumon pangkemeku keton je patut hakotak, keton je labih bakas patut mambagi pangatawan tahiu kapintar tuntang kaharatie.

⁸Tapi je manenga pangatawan tahiu kapintar tuntang kaharati akan olon baya Roh Hatalla Je Jaton Tikas Kuasae.

⁹Oloh manjadi pintar hatati dia awi kabakas umure, oloh kasene katoto dia awi umure panjang.

¹⁰Awi te hining auhku; nenga katika uka aku mansanan auh tirok ayungku.

¹¹Aku sabar manyeneh metoh keton hakotak, tuntang mentai metoh keton manggau auh je pintar harati.

¹²Aku manyeneh titip-titip tuntang katawan keton dia mandino hasil; Kasalan huang kotak Yob dia olih keton mambuktie.

¹³Kilen ampie keton olih mansanan je keton jari sondau pangatawan tahiu kapintar tuntang kaharati? Awi keton tarapaksa manyarah. Je tau manombah auh Yob baya Hatalla bewei.

¹⁴Yob bapander dengan keton dia dengangku, tapi aku dia manenga auh panombah auhe kilau keton.

¹⁵Yob, ewen bingung tuntang dia olih tombah auhm: jaton taloh je tau insanan ewen akam.

¹⁶Ewen baya mendeng ih tuntang dia olih hakotak tinai. En aku musti magon manunggu aloh ewen jari manyuni arepe?

¹⁷Dia, aku nahuang tombah metoh toh kea; tuntang mansanan tirokku akam.

¹⁸Aku jari dia sabar manunggu, dia olihku hindai manahan auhku.

¹⁹Amon aku suni maka aku pusit, kilau kantong je kontep anggor taheta.

²⁰Aku musti hakotak, mangat ateiku dia balisah; aku musti mambuka nyamangku manenga panombah.

²¹Aku dia mandohop eweh bewei hong perkara toh tuntang ije mahin dia je inaraku.

²²Auh manara oloh mahin dia aku katawae, tuntang jaka ih aku malalus taloh te, Hatalla bajeleng mahukum aku.