Read Ngaju YOB 33 Bible Online

YOB 33 - Ngaju bible

YOB 33

¹Toh, Yob, seneh bua-buah kare auh je handak inyampaiku toh.

²Aku jari batatap handak hakotak.

³Dengan kabujur atei aku bapander; je insanangku toh auh je katotoe.

⁴Roh Hatalla jadi manjapa aku tuntang manenga pambelom akangku.

⁵Jadi amon olih, nombah auhku. Nyadia auh pambelaam.

⁶Hong taharep Hatalla, ikau tuntang aku sama awi sama inampae bara petak liat.

⁷Jadi dia usah ikau mikeh dengangku; aku dia nahuang mampakalah ikau.

⁸Toh aku jari mahining narai taloh je ingotakm, tuntang aku olih harati taloh je koam te.

⁹Ikau hamauh, ‘Aku barasih, jaton mawi pelanggaran. Aku barasih tuntang jaton mawi kasalan.

¹⁰Tapi Hatalla manggau-gau sabab malawan aku, tuntang Ie mawi aku kilau musoh.

¹¹ Ie mangkepan rantai intu paingku, kare tanjong teteiku harajur inantuani Awie.’

¹²O, Yob, tirokm sala toto! Awi Hatalla labih hai bara olon.

¹³Mbuhen ikau mandawa Hatalla dia paduli auh kakotok tuntang kamungoh olon?

¹⁴Hatalla bapander hapan are cara, tapi jaton ije oloh je paduli auh Aie.

¹⁵ Hamalem metoh oloh batiroh, Hatalla hakotak hong nupi tuntang taloh tampayah.

¹⁶Hatalla manyoho ewen mahining auh Aie, tuntang ewen inarewen Awie hapan kare tingak.

¹⁷Kahandak Ayue mangat ewen terai mawi dosa tuntang malihi kajohoe.

¹⁸Ie dia manalua ewen buah kabinasa; Ie mangalindong ewen bara pampatei.

¹⁹Hatalla mampuji olon hapan panyakit, sampai bitie kontep kapehe.

²⁰Je haban dia belai kuman, panginan je pangkamangate mahin injileke.

²¹Bitie rusut; kare tulange uras gitan,

²²ie jari bilak haguet akan eka oloh matei lewun oloh matei jari tokep dengae.

²³Mungkin ije bara sakoyan malekat Hatalla je mampingat olon tahiu gawie, akan dumah mandohop ie.

²⁴Dengan asie malekat te hamauh, ‘Lapas ie, dia tau ie haguet akan lewun oloh matei. Toh duit tewuse, mangat ie bebas tinai.’

²⁵Bitie kareh jadi abas tuntang barigas kilau oloh tabela.

²⁶Amon ie balakudoa Hatalla akan masi ie; ie akan manara Hatalla dengan kahanjak; tuntang Hatalla mahalalian ampin pambelome.

²⁷Intu baun oloh are ie akan hamauh, ‘Je papa inahaku bahalap, hai dosangku, tapi Hatalla dia mahukum aku.’

²⁸Ie mangahana aku haguet akan lewun oloh matei, sampai aku magon belom sampai katika toh.

²⁹Jari pire-pire tingkat Hatalla malalus uras kare taloh toh;

³⁰mangat Ie olih manyalamat pambelom olon, tuntang manenga kasanang huang pambelome.

³¹Toh, Yob, hining auhku; nyeneh bua-buah, keleh suni, toh aku handak bapander.

³²Tapi amon aton je handak ingotakm, takan bapander; amon ikau bujur, aku nahuang mangakue.

³³Tapi amon dia, keleh suni tuntang hining auhku, aku handak majar tahiu kapintar tuntang kaharati akam.