Read Ngaju YOB 36 Bible Online

YOB 36 - Ngaju bible

YOB 36

¹Hining auhku hanjulo tinai, tuntang keleh sabar; magon aton je handak insanangku tagal Hatalla.

³Pangatawangku are; aku handak manggunae uka mamparahan tahiu je manjapa aku te adil.

⁴Jaton kotakku je dia toto; oloh je puna pintar harati aton intu taharepm.

⁵Hatalla puna gagah! Uras taloh jari iharatie. Jaton ije biti oloh inawahe.

⁶Oloh je badosa dia Ie manaluae belom tahi, Ie manenga keadilan akan oloh je buah kasusah.

⁷Ie manantuani oloh bujur; inenga Awie akan ewen kuasa kilau kare raja, sampai ewen ihormat palus katatahie.

⁸Tapi amon oloh imasong hapan rantai sanaman, mangkeme kapehe awi taloh gawie kabuat,

⁹maka dosa tuntang kajohon ewen akan imparahan awi Hatalla.

¹⁰Ewen inyohoe mahining auh pampingat Aie, tuntang malihi kare gawin ewen je papa.

¹¹Amon ewen manumon auh Hatalla tuntang manempo Ie, ewen belom sanang tuntang makmur sampai lawin pambelome.

¹²Tapi amon dia mahining, ewen akan matei huang kahumong.

¹³Oloh je jaton bara TUHAN mingkes kasangit; aloh ihukum awi TUHAN, ewen dia handak balaku dohop.

¹⁴Ewen matei awi kahekae metoh katabelae, awi pambelome kontep dengan kapapa.

¹⁵Hatalla majar oloh mahalau kapehe, tuntang mahapan kajake mamparendeng tiroke.

¹⁶Hatalla mambebas ikau bara kasusah, sampai ikau olih mangkeme kasanang, tuntang mejam kontep taloh kinan.

¹⁷Tapi toh tumon kapapam, ikau manarima hukuman akam.

¹⁸Keleh barendeng, ela ikau buah tipu awi duit suap; ela ikau impalayang awi panatau.

¹⁹Jaton gunae ikau mantehau balaku dohop, jaton gunae kare ekang tuntang kagancangm.

²⁰Ela mangenang alem je kaput, katika kare bangsa nihau lilap.

²¹Rende-rendeng, ela mules talih kadarhaka. Awi kapehem te mangat ikau malihi kare gawi papa.

²²Keleh mingat, Hatalla puna paham kahain kuasan Aie. En aton guru je kilau katamam Ayue?

²³Eweh je tau manukas jalan Akae atawa bahanyi mandawa Ie mawi kasalan?

²⁴Harajur Ie inara tagal kare gawin Awie, tuntang ikau mahin patut mampahai Ie.

²⁵Uras oloh jari mite gawie; tapi jaton ije biti je toto-toto haratie.[51]

²⁶Hatalla puna hai, dia olih sampai pangatawan itah, atawa mise kare nyelon Aie.

²⁷Hatalla te je minyop danum bara petak manjadi baunandau balalu mobahe jadi pantis andau ujan.

²⁸Ie mananturau ujan bara baunandau, inata Awie akan kakare olon.

²⁹Jaton ije biti je katawan ampin pangguet baunandau hayak auh nyaho intu langit eka Hatalla melai.

³⁰Ie mampalawa hapus langit hapan kilat, tapi palempang tasik magon kaput pijem.

³¹Kalote carae ie mambelom[52] kakare bangsa tuntang manenga panginan je malabien.

³²Ie manyingkap kilat hapan lengen Aie, tuntang manyoho Ie manyambar akan eka tintue.

³³Auh nyaho manenga tanda je riwut barat akan mamok, kare kawan meto ain oloh mahin bajeleng katawan je riwut barat dumah.