Read Ngaju YOB 37 Bible Online

YOB 37 - Ngaju bible

YOB 37

¹Riwut barat mawi ateiku gaer tuntang usokku ruga-rugap.

²Nyeneh auh Hatalla, o keton samandiai; hining auh je haguroh balua bara nyaman Aie.

³Ie malapas kilat Ayue akan hapus langit; Ie mangirime akan hapus kalunen.

⁴Limbah te tarahining auh Aie goho-gohop, auh garuntong nyaho tuntang auh guroh; tuntang marak auh je manantegar, nyaro mamancar hayak sambar-manyambar dia kalayan.

⁵Awi prentah Hatalla taloh heran manjadi, taloh je dia tame akal je dia itah haratie.

⁶Salju manjato akan petak awi parentah Aie, ujan je labat mohon tagal sohon Aie.

⁷Ie mampatende gawin oloh; mangat ewen katawan Ie kanjerae bagawi.

⁸Tinai meto bariar tame lowang tuntang goha, tuntang mangalindong arepe huang sarangae.

⁹Bara salatan dumah riwut barat tuntang bara utara dumah kasadingen paham.

¹⁰Tahaseng Hatalla mawi danum je lombah jadi baku, palus mobahe manjadi es je batekang.

¹¹Baunandau je babilem imuate hapan danum, tuntang baunandau balawa awi kalawan nyaro.

¹²Baunandau tarawang akan hapus kalunen, awi parentah Hatalla ewen haguet akan hete-hete.

¹³Hatalla manenga ujan hapa mambisa petak, atawa kea hapa mahukum ungkup oloh kalunen; kahain sintan Aie je tetep sampai katatahie.

¹⁴Suni hanjulo, Yob, tuntang nyeneh: nantuani ampin kare taloh heran je iawi Hatalla.

¹⁵En katawam kilen ampie Hatalla manenga parentah, sampai kilat manyabintir bara baunandau ije akan baunandau tuntang ambon?

¹⁶En katawam kilen ampie baunandau te tarawang hasil kaapik Hatalla je mampahengan?

¹⁷Dia, ikau baya tau mungoh awi kalasut, amon petak inampur awi riwut salatan.

¹⁸En olihm kilau Hatalla membirang langit tuntang mampatekange kilau sanaman je inoang atawa kaca?

¹⁹Ajar ikei taloh je patut ikei mansanae akan Hatalla; jaton je olih ikei manarange, ontek ikei buang.

²⁰Aku dia nahuang balaku hakotak dengan Hatalla; ela-ela Ie mandino buku sabab je mawi aku calaka.

²¹Katika toh kalawan langit tarang toto sampai mampasilau mate; kius riwut mamparasih andau.

²²Kalawa kilau amas gitan intu hila utara, tuntang kahain Hatalla mampahengan atei itah.

²³Toto hai kuasan Hatallan itah, sampai itah dia olih manokep Ie. Ie bujur tuntang harajur adil; dia puji Ie mahenyek olon.

²⁴Jete sababe Ie patut ihormat awi eweh bewei, tuntang Ie dia paduli dengan oloh je mangaku erepe pintar harati.”