Read Ngaju YOB 38 Bible Online

YOB 38 - Ngaju bible

YOB 38

¹Limbah te bara huang riwut barat TUHAN hamauh dengan Yob, kalotoh:

²“Eweh ikau, sampai bahanyi bembang tahiu pangatawan tahiu kapaintar tuntang kaharati ayung-Ku hapan kotak je humong tuntang ngahus bewei?

³Toh, naharep Aku kilau oloh hatue, tuntang nombah kare paisek-Ku.

⁴En jadi aton ikau metoh Aku manjapa kalunen? Amon puna are pangatawam, sanan!

⁵Eweh je manukas kalombah kalunen? Eweh mangancang tali hapa mukure? En tawam auh tombahe?

⁶Kilen ampie kare jihi[53] je manongket kalunen tau mendeng segah? Eweh je mandak batu panjeup puting kalunen je segah,

⁷metoh kare bintang sawah manyanyi haya-hayak tuntang kare kawan taloh belom hong sorga[54] basasurak hanjak.

⁸ Eweh mangampeng tasik[55] hapan atep bauntonggang katika bara penda petak mangambuar balua danume?

⁹Aku toh je manyangkulep tasik hapan baunandau tuntang mamungkuse hapan kakaput.

¹⁰Aku manukas tikas saran tasik, tuntang dengan bauntonggang bahuit aku mangampenge.

¹¹Koang-Ku dengae, ‘Jetoh tikas sarae. Ela ikau mahalaue! Intu hetoh kare riakm je hai musti tende.’

¹²Yob, en puji ikau aloh sinde bewei, manyoho tampalawei dumah?

¹³En puji ikau manyoho tampalawei mimbing kalunen tuntang manantawus oloh papa bara eka ewen manyahokan?

¹⁴Kalawan andau tarang mamparahan bukit tuntang janah, kilau cap intu petak liat tuntang awan lipet intu jubah.

¹⁵Kalawan andau lalau balawa akan oloh je dia kasene TUHAN, tuntang manahan ewen malalus kakaras.

¹⁶En puji ikau mohon akan labehon tasik je timben intu palempange? En puji ikau tanjo-tanjong intu laseh tasik lombah?

¹⁷En puji oloh mamparahan akam lawang intu hila bauntonggang lewun kare liau oloh matei je kaput pijem?

¹⁸En olih ikau ngakira kalombah kalunen? Nombah amon ikau katawae.

¹⁹Tawam bara kueh panumah kalawa, tuntang hong kueh katotoe eka asal kakaput?

²⁰En olih ikau manenga tikas helat kakaput dengan kalawa? Atawa manyoho ewen buli limbah ewen dumah?

²¹Batantu ikau olih awi ikau jari bakas, tuntang metoh kalunen injapa ikau jari aton!

²²En puji ikau manalih kare gudang ayung-Ku? eka salju tuntang ujan batu,

²³je ingkes-Ku akan wayah kajake, akan wayah parang tuntang kare andau kalahi?

²⁴En tawam eka matanandau melai? atawa kueh asal eka riwut timor?

²⁵Eweh je mangali tarusan akan ujan labat tuntang manenga jalan akan nyaho tuntang kilat?

²⁶Eweh je mampamohon ujan akan padang pasir, tuntang akan hunjun petak je jaton olon melaie?

²⁷Eweh je manata petak je keang kamahau sampai oru uras manyalundik?

²⁸En ujan aton bapae? Eweh bapa kare titik ambon?

²⁹En danum es aton indue? Eweh je manak ambon baku?

³⁰Eweh je mobah danum jadi batu, tuntang mawi bilon danum tasik batekang dia hagerek?

³¹ En olih ikau mameteng bintang tampong bua? atawa ikau mengkak pasong bintang patendo?

³²En olih ikau mangagalan kare bintang genep wayahe, tuntang manukas jalan bintang Ijang Bawoi dengan kare anake?

³³En ikau katawan ampin atoh kare taloh intu langit? Tuntang en olih ikau malalus atoh kilau te hong kalunen toh?

³⁴En olih ikau mangkariak manganan auh parentah akan baunandau, tuntang manyoho ie manata ikau hapan ujan?

³⁵Tuntang amon ikau marentah kilat hasambar, en ewen dumah palus hamauh, “Yoh, tuan?”

³⁶Bara eweh burong ibis[56] katawan hamaparea Sungei Nil soho? Eweh je mansanan akan manok jagau tahiu andau handak ujan?

³⁷Eweh je sukup kapintare mise baunandau tuntang manambalike sampai mohon ujan,

³⁸ujan je manekang kawo balalu hakumpal, tuntang petak jadi harapet?

³⁹En olih ikau mandop meto akan panginan singa, tuntang mambesoh kanain kare anake,

⁴⁰amon ewen bakalindong huang goha atawa menter awi manunggu huang sarangae?

⁴¹Eweh mandohop burong kak je balau tuntang basiur kanih kate manggau panginae? Eweh tinai manenga pandohop amon kare anake mantehau aku balaku panginan?