Read Ngaju YOB 39 Bible Online

YOB 39 - Ngaju bible

YOB 39

¹En tawam hamparea kambing bukit inakan indue? En puji ikau mite bajang baliar manak?

²En tawam pire katahie ewen batihi? En olihm mangatawan hamparea ewen manak?

³En katawam hamparea ewen mangarekot bitie, balalu luas kare anake?

⁴Kakare anake sasar hai tuntang abas hong padang; ewen haguet malihi indue tuntang dia haluli tinai.

⁵Eweh maliwus kalidai baliar intu parak kayu? Eweh mengkak talie tuntang manalua ie kumbang kamba?

⁶Aku manenga padang pasir akae kilau humae tuntang kare padang uyah ekae melai.

⁷Ewen mangejau arepe bara kare lewu tuntang eka karami, jaton ije je tau mampalineke tuntang manggunae hapa bagawi.

⁸Padang oru intu bukit eka panginae, ekae manggau kare dawen mangor je bahijau.

⁹En sapi baliar handak bagawi akam? En ie maku baramalem hong karambang meto ayum?

¹⁰En tau ikau manjarate tuntang mamaksae maluku? En tau ikau manyoho ie manyarak tanam?

¹¹En olih ikau maandal kagancange, tuntang manyarah akae gawim je babehat?

¹²En ikau percaya dengae mamumpong hasil getem ayum, tuntang mimbit ie akan eka mihik?

¹³Dia laluen kacapate burong onta mangepek palapase! tapi dia olihe mananding tarawang burong bangau.

¹⁴Burong onta nanteloh hunjun petak balalu lihie; maka baras bewei je mangalasut tantelohe.

¹⁵Ie dia katawan je oloh tau mahunjee tuntang kare meto baliar tau manampijake.

¹⁶Ie mawi anake kila-kilau jaka dia anak ayue; ie dia paduli jaka kare gawie te hayang bewei.

¹⁷Aku toh je mawi ie humong tuntang paleng, dia Aku manenga akae akal tuntang pangatawan tahiu kapintar tuntang kaharati.

¹⁸Tapi amon ie manampara mampalias darie,[57] ie mampakalah kuda tuntang oloh je manongkange.

¹⁹O Yob, en ikau je manenga kaabas akan kuda tuntang bulun tekoke je kupang kipis?

²⁰En ikau je manyohoe nangkajok kilau sangkalap, tuntang mampikeh oloh hapan kamehos uronge?

²¹Ie mangakas petak intu janah dengan kahanjak, tuntang hapan salepah kahias atei ie haguet akan eka parang.

²²Ie dia kasene riman gaer tuntang mikeh: dia aton padang je tau mawi ie mules balalu undur.

²³Kare pakakas parang je imbit oloh je manongkange mangarincing auhe tuntang ngila-ngilat buah kalawan matanandau.

²⁴Hapan kahias atei je malabien kuda te hadari; amon tarompet mahiau dia olihe manahan arepe.

²⁵Kamehus uronge mahiau gagenep taropet impahiau bara kejau olih ie mangkeme ewau parang. Hininge auh kariak kare perwira katika ewen manenga parentah.

²⁶En burong antang iajarm tarawang amon ie manintu hila salatan hayak mambirang palapase?

²⁷En parentah ayumkah je inumon burong nasar helo bara ie manampa sarangae hong bukit gantong?

²⁸Ie mawi humae intu tantan bukit batu, tuntang tapakan kare batu je batajim jadi kotae.

²⁹Bara hete ie manantuani akan hete-hete matae mimpa manggau taloh kinae.

³⁰ Hong kueh aton taloh je matei, hong hete ie aton, tuntang dahan taloh kinae te inyop awi anake.