Read Ngaju YOB 4 Bible Online

YOB 4 - Ngaju bible

YOB 4

¹Palus Elipas hamauh, koae: “Yob, en ikau basingi amon aku bapander? Aku dia olih tahi manyuni arepku.

³Are oloh je jari iajarm, tuntang ewen je balemo je jari impaabasm.

⁴Auhm je manenga kahias atei, mandehen oloh je tantarang, balemo tuntang heka.

⁵Tapi toh ikau kabuat buah kapehen atei; ikau tarewen tuntang nihau kaharapm.

⁶En dia ikau baketep dengan Hatalla; pambelom ayum kea puna tinduh. Amon puna kalote, maka patut toto ikau percaya tuntang dia nihau kaharapm.

⁷Keleh manirok, en puji oloh je dia mawi kasalan buah calaka tuntang kajake?

⁸Aku katawan bara panampayah iete oloh je maluku tana ain kapapa, tuntang manawor binyin kajake kilau taloh imbul, akan manggetem calaka tuntang kasusah!

⁹Kilau riwut barat, kalote kalait Hatalla mambinasa ewen sampai lumat!

¹⁰Oloh papa manyakungkong tuntang mangareheng kilau singa. Tapi Hatalla mangop baue tuntang mamelek kakare kasingae.

¹¹Ewen matei kilau singa je tapas panginae, sampai kare anake kasaburan dia baramana.

¹²Puji ije pangarinah sampai akangku, kilau auh bisik je korik toto intu pindingku.

¹³ Taloh te manderoh tirohku, sama kilau buah nupi papa hong alem kaput pijem.

¹⁴Palus aku tarewen tuntang hagenjeh mikeh; hapus bitingku hongge tuntang harujut.

¹⁵Riwut je kiu-kius mawi baungku; palus giring bulungku.

¹⁶Salenga aton taloh mendeng intu taharepku, aku mananturee, tapi taloh je ampin je dia puji aku mitee. Palus aku mahining auh mangarak taloh je tunis benyem te.

¹⁷‘En tau oloh jaton bara kasalan intu taharep Hatalla?[7] En tau ie jaton bara kapapa[8] hong tampayah Je Manjapa ie?

¹⁸Kare rewar Hatalla hong sorga, mahin dia olih imercaya Awie. Sampai dengan kare malekat Ayue, mahin aton inyondaue kasalan tuntang kapapa.

¹⁹Mahi-mahi tinai kare taloh belom je bara petak liat kare taloh belom je bara kawo tau imicik kilau gagat!

²⁰Taloh belom je belom hanjewu, palus matei halelek hong sasanja, sampai katatahie ie dia ingenang tinai.

²¹Lepah lilap kare taloh je ie tempoe; ie palus matei jaton bara kapintar tuntang kaharati.’