Read Ngaju YOB 41 Bible Online

YOB 41 - Ngaju bible

YOB 41

¹ En olih ikau manawan bajai Lewiatan,[59] baya hapan pisin lauk? En olih ikau manjarat jelae hapan talin jarat?

²En olih ikau mangkepan tali intu uronge atawa manembus ijange hapan kawit sanaman?

³En tau ie balaku dengam uka malapas ie? atawae hapakat dengam balaku pasim?

⁴En tau ie manampa pakat dengam, tuntang hajanji harajur manyang ikau?

⁵En tau ikau manjarat ie kilau burong je ihaga, je manyanang atei kare rewar je bawi?

⁶En tau ie indagang awi kare oloh palauk tuntang imbagie akan kare oloh dagang?

⁷En olih ikau manembus upake hapan simpang mata telo, atawa mambelas tirok manembus takoloke?

⁸Nigong ie sinde ih, tuntang ela manigonge tinai, kalahi te dia akan ikau mangalapeae sampai katatahie.

⁹Eweh je mite Lewiatan akan balemo halelek balalu tujah.

¹⁰Ie basiak amon impisik bara tirohe; jaton ije biti oloh je bahanyi mendeng intu hila baue.

¹¹ Eweh je olih manyarang ie je dia buah kapehe? Intu hapus kalunen toh jaton je olih malaluse.

¹²Toh keleh aku manyarita akam tahiu ramon bitin Lewiatan, tahiu kaabase tuntang ampin tampae je bahalap.

¹³Jaton oloh je olih marabit bajue hila luar atawa manembus baju parang[60] je ihapae.

¹⁴Eweh je olih marakang ijange je kuat, je inumbo kare kasinge je bakaike-ikeh?

¹⁵Kilau kare talawang je inyusun, jete tulang likute[61] hakeket rapat tuntang batekang kilau batu.

¹⁶Henyet tunto-tuntong, leket harapet, sampai riwut mahin dia olih manselat.

¹⁷Talawang te hasangkawit sama arepe segah toto sampai jaton tau imisah tinai.

¹⁸Amon Lewiatan banyen, kalawa mamancar balua; ampin matae mangilat kilau palembut matanandau.

¹⁹Jelan apui manampurus bara nyamae, gutin apui rawo-rawo akan hete-hete.

²⁰Asep mangangkewol bara uronge, sama kilau asep bara pandok apui je hanyala penda kawah.

²¹Tahasenge mampanyala barah; nyalan apui balua bara nyamae.

²²Tekoke abas toto, sampai uras oloh takikeh intu taharepe.

²³Jaton eka je balemo intu upake; dia tau pusit awi batekang kilau katekang waja.

²⁴Ateie kilau kasegah batu, ie dia puji bembang dehen tuntang batekang kilau batu gilingan.

²⁵Amon ie harikas, oloh je pangkaabase[62] mahin nihau kahanyie, iawi dia olih malawan awi paham kikehe.

²⁶Jaton ati padang je olih mampahimang ie; lunju, panah atawa tirok dia olih mangapehe ie.

²⁷Sanaman itonge kilau oru tuntang tambaga kilau kalemon kayu je hakulat.

²⁸Jaton ati panah je tau maharak ie; batu je imanting buah ie itonge kilau tampilai bewei.

²⁹Gagada itonge kilau ije kahijir oru keang; ie tatawe amon oloh mambelas tirok.

³⁰Tisik kanaie kilau kiwak kasa je batajim tapakae. Kilau pakakas mihik[63] ie mangaruit petak kisak tuntang manyilae.

³¹Tasik ingurahe sampai kilau danum manara. kilau ketel eka mananak undus je habure.

³²Ie mampelai awan tatap paie je tau mampalua kalawa, tasik iobahe jadi bure je baputi.

³³Intu hunjun petak toh jaton je olih malawan ie, taloh belom je jaton bara kikeh, jete ie!

³⁴Meto je pangkatamame mahin inawahe ie raja hong marak meto basiak.”