Read Ngaju YOB 42 Bible Online

YOB 42 - Ngaju bible

YOB 42

¹Palus Yob tombah auh TUHAN, “Aku katawan, o TUHAN, tahiu Ikau Je Jaton Tikas Kuasam; Ikau olih malalus narai bewei.

³ Ikau misek mbuhen aku bahanyi mansanan kabembangku dengan pangatawan tahiu kapintar tuntang kaharatin Aim padahal aku kabuat dia katawan taloh en-en. Aku mamander taloh ije dia aku haratie, tahiu taloh je baka hera-heran akangku.

⁴ Ikau manyoho aku manyeneh metoh ikau hakotak, tuntang manenga panombah amon Ikau misek.

⁵Bihin, pangatawangku tahiu Ikau baya hiningku bara oloh bewei, tapi toh aku kasene Ikau hataharep bau.

⁶Awi te aku mahamen mingat kare auhku tuntang dengan kanyasalku, aku mondok hong petak tuntang kawo.”

⁷Limbah lepah hakotak dengan Yob, TUHAN hamauh dengan Elipas, “Aku sangit dengam tuntang due sobatm te, awi keton dia mansanan je katotoe tahiu Aku. Tapi rewar-Ku Yob dia kalote.

⁸Tagal te, nduan toh kea uju kongan sapi hatue tuntang uju kongan tabiri hatue, balalu lius talih Yob Limbah te luput urase te kilau parapah je ingehu akan arep keton. Yob kareh balakudoa akan keton tuntang lakudoae akan inarima awi-Ku. Aku dia mampahawen keton aloh keton patut manarima hukum. Keton dia mansanan je katotoe tahiu Aku, tapi Yob mansanae.”

⁹Elipas, Bildad tuntang Sopar malalus taloh je inyoho TUHAN, tuntang TUHAN manarima lakudoan Yob.

¹⁰ Palus, limbah Yob balakudoa akan telo biti sobate te, TUHAN manjadian ie tatau tinai. TUHAN manenga akae due lipet bara hapus panataue je helo bihin.

¹¹Uras kaka tuntang betau Yob, tuntang uras kapatuhe je helo, dumah maja palus omba pesta haya-hayak dengae intu humae. Ewen mansanan omba pehe atei tagal kare kasusah je jari iawi TUHAN akae, tuntang mampong ie. Genep bitin ewen manenga duit tuntang ije tisin amas akan Yob.

¹²Yob imberkat TUHAN labih are hong tisan pambelome, bara metoh pambelome helo bara ie buah calaka. Yob tempon 14.000 kongan kambing, 6.000 kongan onta, 2.000 kongan sapi, tuntang 1.000 kongan kalidai.

¹³Ie mandino uju biti anak hatue tuntang telo biti anak bawi.

¹⁴Anak bawi je solake inggaree Yemima, je kadue Kesia, tuntang je busu Kerenhapukh.[64]

¹⁵Intu hapus tanah te jaton oloh bawi tumon kahalap telo anak bawi ain Yob Ewen inenga bagi hong waris bapae, sama dengan kare paharin ewen je hatue.

¹⁶Limbah te Yob magon belom saratus epat puluh nyelo katahie, sampai ie sampet mite kare esoe tuntang kare anak ewen.

¹⁷Palus Yob malihi kalunen hong umur je bakas toto.