Read Ngaju YOB 6 Bible Online

YOB 6 - Ngaju bible

YOB 6

¹Palus Yob tombah, “Jaka kapehengku inimbang ehate,

³batantu labih babehat bara baras intu saran tasik. Jadi, ela heran amon kare kotak aingku toh kurang batawat hayak kajeng-kiso.

⁴Panah bara Je Jaton Tikas Kuasae manembus bitingku; ipue tayap akan hapus bereng hambaruangku. Kahain Hatalla bakaike-ikeh, tuntang manyarang aku kilau pasukan musoh.

⁵Kalidai kareh sanang amon inenga kare suloh oru, kalote kea sapi amon inenga panginae.

⁶Tapi panginan batawah, eweh je handak? Kueh tau kaputin tanteloh aton angate?

⁷Aku dia nahuang manigonge; muta[12] aku amon kumae.

⁸Mbuhen Hatalla bakulas mahining lakudoangku? Mbuhen Ie dia manyeneh auh pantehauku?

⁹Keleh Hatalla nahuang mamparamok aku! Keleh Ie nahuang mampatei aku.

¹⁰Akangku taloh te jadi ampong; aku kareh manari marak kare kapehe. Kare parentah Hatalla Je Barasih Haliai, jari inumongku tuntang harajur inantuaniku.

¹¹Narai kaabasku sampai aku magon aton? Narai kaharapku uka belom labih tahi tinai?

¹²En kilau katekang batu berengku toh? En bitingku toh bara tambaga?

¹³Lepah kaabasku manggau pandohop; akangku jaton tinai pandohop.

¹⁴Hong kapehe[13] kilau toh, aku mangandahau ije puna toto-toto sobat. En aku tetep baketep atawa malihi Je Jaton Tikas Kuasae.

¹⁵Tapi keton, o kare sobat, dia olih imercaya tuntang eka kaharap. Keton kilau sungei je jari lepah danume, katika ujan jaton duma-dumah.

¹⁶Keton sama kilau sungei je benyem tuntang kejang, awi inutup salju tuntang danum je baku.

¹⁷Sana sampai wayah pandang, salju tuntang es te nihau jaton bara awan. Palempang sungei jadi karitip jaton bara danum tuntang keang kamahau.

¹⁸Kare kapilah layang metoh manggau danum, ewen manamuei tuntang matei intu padang pasir.

¹⁹Kapilah bara Seba tuntang bara Tema manggau danum te tuntang maharape.

²⁰Tapi kaharap ewen ngahus bewei intu saran kalin danum je jaton danume.

²¹Kilau[14] sungei jete iete keton, o sobatku; ikau undur tuntang mikeh mite kapehengku.

²²Mbuhen? En aku balaku taloh en-en bara keton? Atawa manyoho keton manyogok oloh mangat baguna akangku?

²³En aku balaku inyalamat tuntang inewus bara musoh je jaton asie?

²⁴Has, keleh majar aku, parahan kasalangku! Aku kareh suni tuntang mahining auh keton.

²⁵Kare auh je bujur manyadingen atei, tapi auh keton buang, jaton bara rima!

²⁶Uras auhku itong keton kilau riwut; ngahus bewei keton manombah auhku je jari nihau kaharape.

²⁷Sampai anak nole mahin inenong keton kajarian pambalome, sobat je heret dengan keton mahin imikir keton mangat keton tatau.

²⁸Ayo, nampayah aku; lalehan kea sampai aku mananjaro keton?

²⁹Ela malalus taloh je dia bujur, keleh barendeng! Ela manyalan aku, aku toto puna dia sala.

³⁰En keton manyangka aku mananjaro, dia olih mangasene taloh je bahalap tuntang taloh je papa?