Read Ngaju YOB 7 Bible Online

YOB 7 - Ngaju bible

YOB 7

¹Olon kilau imaksa mambelom arepe; pambelome babehat kilau pambelom oloh je duan upah;

²kilau jipen je taharu mangandahau eka kanjungen; kilau oloh je bagawi mentai upah.

³Bulan baganti bulan pambelomku jaton bara tujuan; kelote kea alem baganti alem pambelomku kontep dengan kapehen atei.

⁴Amon aku handak batiroh, alem kameangku panjang; aku taharo andau bajeleng sawah, aku dia tau menter sanang.

⁵Bitingku kontep handalai tuntang karipang buhit; pupusku bahimang tuntang hanana.

⁶Pambelomku je jaton kaharape te miar balias manintu kahapuse, labih balias bara tukang manantang mampamiar eka lawai.

⁷Keleh mingat, o Hatalla, pambelomku baya tahaseng je ihimon; kasanangku nihau lepah dia gitan awae.

⁸Metoh toh Ikau mite aku — tapi dia tahi. Amon kareh Ikau manggau aku, aku jari jaton.

⁹Sama kilau baunandau je derem balalu nihau, olon kea matei dia akan haluli tinai. Uras oloh je puji kasene ie, kalapean dengae tuntang dia mingate tinai.

¹¹Awi te aku dia olih suni! Angat kapehe tuntang kajakengku dia olih aku manyarenae! Aku musti marakang nyamangku, tuntang mampalua isin ateiku.

¹²Mbuhen ikau harajur manantuani tuntang manjaga aku? En aku toh naga tasik[15] je tau mawi bahaya?

¹³Aku menter tuntang handak malayan kaheka; aku manggau angat kasalawah bara pangkemeku je paham balisah.

¹⁴Tapi Ikau mampikeh aku huang nupi; Ikau mampalembut nupi papa tuntang paite.

¹⁵Sampai aku mangkeme keleh aku ihekak palus matei bara belom huang biti bereng je kontep kapehe toh.

¹⁶Aku heka tuntang peda belom; aku mipen matei! Nalua aku, awi pambelomku jaton bara rima.

¹⁷ Mbuhen olon paham baguna Akam? Mbuhen kare gawie inantuani Awim harajur?

¹⁸Ikau mananture ie genep hanjewu, tuntang mauji ie sining katika.

¹⁹Hamparea Ikau mules bara aku, mangat aku sampet manelen iwehku?

²⁰O Je Manjaga aku, en Ikau rugi awi dosangku? Mbuhen Ikau manenan panah Aim manintu aku? En bitingku paham mambehat Ikau?

²¹En dia tau Ikau mampun dosangku? En dia tau Ikau manganan kasalangku? Dia tahi tinai aku menter huang kubur, tuntang amon Ikau manggau aku, Ikau dia akan sondau aku.”