Read Ngaju YOB 8 Bible Online

YOB 8 - Ngaju bible

YOB 8

¹Palus Bildad hamauh, “Kilen katahie tinai ikau magon hamauh kilau te? Auh kotakm kilau auh gotok riwut.

³Hatalla dia puji mamingkok kabujur; kare katoto uras olihe malaluse.

⁴Eweh katawae, mikeh kea kare anakm badosa Dengae, maka patut bewei ewen ihukum Awie.

⁵Tapi amon ikau bakalindong Dengae, balaku asi tuntang balaku ampun,

⁶amon ateim bujur, jaton bara kasalan, Hatalla bajeleng mandohop ikau; tuntang indu balehe, huma serokm kareh ihalalian.

⁷Panatau je nihau te jaton bara rima amon inanding dengan kare taloh je dinom kareh.

⁸Keleh ikau manantuani oloh pintar harati jaman horan tuntang manirok pangalaman kare tato hiang.

⁹Pambelom itah pandak, itah dia katawan taloh en-en; kare andau itah sama kilau kangkalingen bewei.

¹⁰Hining tahiu oloh pintar harati te bihin, ewen manenga ajar jetoh akam,

¹¹‘Hong eka je hadanum baya tau tumbo puron; tuntang hong petak je bisa-bisa tau tumbo pudak.

¹²Amon danume keang, puron te ngarigit, labih bajeleng bara taloh tumbo je beken. Puron te je sapunae magon bahijau hindai katikae, akan inatak tuntang ingguna.

¹³Tumon te kajarian oloh je jaton bara TUHAN. Ie mangalapean Hatalla, balalu nihau kaharape.

¹⁴Ie mampatamam ije kahijir lawai je balemo; ie percaya dengan sarangan lalawa.

¹⁵En sarangan lalawa te tahan eka basinggoh? En lawai te dehen eka bahimbing?’

¹⁶Kilau tingen, oloh je dia bara TUHAN te barigas; amon buah kalawan matanandau, ie belom bajewong tuntang mangontep kabon kambang.

¹⁷Uhate mangalilit[16] kare batu hong petak, dehen mangalilit, ie dia murah balekak.

¹⁸Tapi, coba toh ikau manjawut tingen te, maka ie kilau-kilau jaka dia puji tumbo intu hete.

¹⁹Yoh, kasanang oloh papa baya jete bewei; oloh beken dumah tuntang manalinjam ie.

²⁰Tapi Hatalla dia puji malihi oloh je baketep tuntang dia puji kea Ie mandohop oloh darhaka.

²¹Ie mawi nyamam kareh tatawe, tuntang totokm akan hanjak basasurak.

²²Oloh je manyingi ikau kareh mahamen, tuntang mangkeme randah, human oloh papa akan imparusak sampai lepah lumat.”