Read Ngaju YOB 9 Bible Online

YOB 9 - Ngaju bible

YOB 9

¹ Tapi Yob tombah, “Punae, aku katawan, kare kotakm te dia sala. Tapi, en olih oloh perkara malawan Hatalla tuntang mampakalah Ie?

³Bara sakoyan paisek Hatalla, ije mahin dia je olih oloh tombahe.[17]

⁴Hatalla te paham kapintar tuntang kaharatie tuntang kuasae; eweh je olih tahan malawan Ie?

⁵Hatalla mindah bukit sampai dia oloh katawae, palus mambalike hong kapaham kasangite.

⁶Hatalla mawi petak hagerek, sampai jihi galang petak hagulak,

⁷Hatalla mangahana matanandau lembut hanjewu, tuntang mangahana bintang mampalua kalawae hamalem.

⁸Ie kabuate mambirang langit, ihunje-inandik Awie likut naga tasik.[18]

⁹ Ingkepan Awie baris bintang salatan intu langit, kea bintang Ijang Bawoi, bintang Patendo tuntang bintang Tampong Bua.

¹⁰Dia olih itah maharati kare gawin Aie, dia olih itah mitong kare taloh heran je ilalus Awie.

¹¹Ie mahalau hila baungku tapi dia aku mitee; Ie mahalau balikatku, tapi dia babala akangku.

¹²Amon Ie marampas, eweh bahanyi mangahanae? atawa bahanyi hamauh Dengae, ‘Narai gawin Aim?’

¹³Hatalla dia manahan karahas Aie tuntang kasangit atei Aie; kare pembantu Rahab[19] mahin mamenda Ie.

¹⁴Jadi kilen ampie aku tau malawan Ie? Hapan bawak kotak en aku akan tombah auh Aie?

¹⁵Aloh aku dia sala, aku jaton bara kaabas, aku baya balaku asi bara Hatalla je mahakim aku.

¹⁶Jaka ih Ie tombah amon aku mantehau, aku bembang, en toto Ie nahuang mahining auhku?

¹⁷Ie mamparotek aku hapan riwut barat Ie mandahang kapehengku jaton bara buku sabab.

¹⁸Ie dia manenga katika akangku manahaseng hanjulo, tapi mantakan aku hapan kapehe je paham.

¹⁹En aku balalu malawan Ie hapan kaabasku? Tapi ite, dia laluen kahain kaabas Aie! Jaka aku manyalan Ie, eweh je bahanyi mantehau Ie[20] akan pengadilan?

²⁰Aku baketep intu Ie tuntang dia mawi dosa, tapi nyamangku hakotak kila-kilau dia tumon te; gagenep bawak kotak je impalua awi nyamangku harajur kilau manyalan arepku kabuat.

²¹Aku dia mawi kasalan, tapi aku dia paduli. Aku peda belom, akangku jaton je mambatang tinai; je sala tuntang je bujur, sama ih kajariae; Hatalla mambinasa kadaduee.

²³Amon oloh je dia sala matei salenga, Hatalla baya tatawe ih.

²⁴Kalunen inyarah Hatalla akan oloh papa; ie mambute kare hakim; Hatalla je mawi taloh handiai toh, amon dia Ie, eweh tinai?

²⁵Kare andauku mahalau balias toto, palus lilap, jaton mangkeme kasanang.

²⁶Kilau arut je balias, kare andauku te mahalau, kilau kalias antang tarawang mohon manyambar panginae.

²⁷Jaka aku nahuang tatawe hanjak, jaka aku handak mangalepean kare kapehe, palus kapehen ateiku dumah haluli manggoang aku; awi katawangku, Hatalla tetep manyalan aku.

²⁹Awi te, narai gunae aku paduli dengan taloh te?

³⁰Jaton ati sabun je tau manganan dosangku!

³¹Hatalla mampaleteng aku hong taloh papa; sampai pakaiangku kabuat bajilek dengangku.

³²Jaka Hatalla te olon, aku olih tombah auh Aie, balalu ikei akan hataharep intu pengadilan, uka mamutus perkaran ikei.

³³Tapi intu helang ikei toh jaton hakim je tau mamutus perkaran ikei ndue toh.

³⁴Keleh jaka Hatalla terai mahukum aku tuntang mangejau taloh je bakaike-ikeh bara aku!

³⁵Aku dia mikeh Dengae tuntang handak bapander metoh toh, awi aku mangasene ateiku kabuat.