Read Ngaju MASMUR 10 Bible Online

MASMUR 10 - Ngaju bible

MASMUR 10

¹Mbuhen Ikau kejau, o TUHAN tuntang basahokan katika ikei buah kajake?

²Dengan kajohoe oloh papa manindas oloh je belom susah; nauhe ewen buah jarat ayun ewen kabuat.

³Oloh papa mangamburau tahiu kanahuange je papa, oloh bakoho mangotok tuntang manolak TUHAN.

⁴Oloh badosa dia paduli dengan TUHAN, awi kajohoe ie manirok Hatalla jaton.

⁵Oloh papa bahasil huang kare usaha; ie dia kasene atawa harati hukum TUHAN. tuntang manawah uras musoh.

⁶Koae hong ateie, “Aku dia kareh gagal, tuntang girir manggirir kilau oloh je dia belom papa.”

⁷ Ie harajur mangotok, maancam tuntang manipu, kare kotake kontep kasingi tuntang kapapa.

⁸Ie basahokan intu kare desa handak mampatei oloh je dia basala. Kilau singa ie mentai intu balikat rowut mangalati oloh je jaton eka kaharap. Ie mimpa oloh je belom susah intu eka je suni manangkarape tuntang mihire haguet.

¹⁰Ie mahukup, tatap handak manangkarap; ie mampalongkang oloh hapan kakaras.

¹¹tiroke, “Hatalla jari kalapean tuntang dia mite; katatahie Ie dia mite aku!”

¹²Harikas, TUHAN, hukum oloh papa! Ingat oloh je buah tindas

¹³Mbuhen oloh papa tarus manawah Hatalla? tuntang manirok Hatalla dia baka mahukum ie?

¹⁴Tapi Ikau mitee; Ikau manantuani kasusah tuntang kapehe, tuntang harajur sadia akan mandohop. Oloh je jaton eka kaharape manyarah arepe akam, Ikau harajur mandohop oloh je belom susah.

¹⁵Keleh manganan kuasan oloh papa tuntang darhaka; keleh mahukum ewen awi gawie sampai ewen jera.

¹⁶TUHAN marentah sampai katatahie; kare bangsa je dia kasene Ie kareh lilap bara tanah Ayue.

¹⁷TUHAN Ikau mahining lakudoan oloh je inawah tuntang mampabas atei ewen.

¹⁸Anak nole tuntang oloh je buah katulas imbelam pakarae mangat jaton aton oloh je mampikeh ewen.