Read Ngaju MASMUR 102 Bible Online

MASMUR 102 - Ngaju bible

MASMUR 102

¹Lakudoan oloh kapehe je huang kauyoh kaheka manarahing intu TUHAN.

²O TUHAN, keleh mahining auh lakudoangku, Keleh auh tehauku sampai Ikau.

³Ela mules bara aku amon aku huang kasusah. Keleh hining amon aku mantehau, tuntang jeleng tombah auhku.

⁴Pambelomku lilap kilau asep; kare tulangku mambarah kilau apui.

⁵Aku heka sama kilau oru keang, tuntang jaton belai kuman.

⁶Aku manarahing hai auhku; bitingku tisa upak mamungkus tulang.

⁷Aku sama kilau burong sabaru inru padang pasir, kilau burong mangkong hong eka kare taloh je baduroh baderep.

⁸Aku dia tau batiroh, kilau burong je ungi-ungin hong sapau huma.

⁹Hapus andau musoh manawah aku; arangku iawi akan hapa manyapa awi oloh je sangit dengangku.

¹⁰Aku kuman kawo kilau rote, taloh ihopku hewoi danum mate,

¹¹awi Ikau jari manggatang tuntang manjakah aku huang kasangit Aim je hasep.

¹²Pambelomku mahalau kilau kangkalingen andau halemei; akan balayu kilau oru.

¹³Tapi Ikau o TUHAN, Raja sampai katatahie, tetep ingenang girir-manggirir.

¹⁴Ikau kareh harikas tuntang masi Sion, katikae akan sampai masi ie.

¹⁵Awi kare rewar Aim sinta dengae, aloh ie jadi taloh je baderep. Ewen masi ie, aloh ie jadi kawo.

¹⁶Kuasan TUHAN kareh ingikeh kare bangsa; tuntang kapaham kahain Ayue ihormat awi kakare raja.

¹⁷Amon TUHAN mamangun Sion haluli, tuntang babala huang kahain Aie je paham.

¹⁸Ie kareh mahining lakudoan ungkup Ayue je susah, tuntang dia manolak auh palakun ewen.

¹⁹Keleh manyurat uras kare gawin TUHAN akan panggereng je rahian, uka bangsa je hindai inakan tau manara Arae.

²⁰TUHAN manangkilik bara eka je gantong, bara sorga Ie manangkilik akan petak,

²¹akan mahining auh tungoh oloh tahanan tuntang maliwu soloh je ihukum matei.

²²Palus Arae kareh imbarita akan Sion, tuntang Ie kareh inara intuYerusalem,

²³katika kare bangsa tuntang kare karajaan hapumpong uka sombayang intu TUHAN.

²⁴TUHAN manggeto kaabasku katika aku tabela, tuntang mamandak umurku.

²⁵Palus aku hamauh, “O Hatalla, ela manduan hambaruangku intu benteng pambelomku.” TUHAN Ikau belom katatahie,

²⁶ bihin Ikau manampa petak; langit kea tampan lengen Aim.

²⁷Uras taloh te kareh lilap; tapi Ikau tetep aton; urasa taloh te kareh kupit kilau pakaian. Ikau manganae kilau kupit baju, palus uras taloh handiai kareh binasa.

²⁸Tapi Ikau tetep sama, pambelom Ayum dia akan hapus.

²⁹Anak eson ikei akan belom taduh sanai, tuntang harajur sanang huang kalindong Aim.