Read Ngaju MASMUR 103 Bible Online

MASMUR 103 - Ngaju bible

MASMUR 103

¹Bara Dawid. Tara TUHAN, o hambaruangku, salepah huangku, tara arae je barasih.

²Tara TUHAN, o hambaruangku, ela kalapean kare kahalap Aie!

³Ie je mampun kakare dosam, je mampakeleh kare panyakitm.

⁴Ie je maliwus hambaruam bara kubur, je mambesoh ikau dengan sinta tuntang asi.

⁵Ie je mameda pambelom ayum[55] dengan taloh bahalap, sampai bunggut katabelam kilau burong nasar.

⁶TUHAN malalus hukum tuntang kaadilan akan kakare oloh je ingapehe.

⁷Ie mansanan rencana Aie akan Moses tuntang kare gawin Aie akan bangsa Israel.

⁸ Awi TUHAN pamasi tuntang panyayang, Ie panjang sabar tuntang sintan Aie je hakutoh.

⁹Ie dia balait raju-rajur, tuntang dia sangit sampai katatahie.

¹⁰Ie dia mahukum itah tumon dosan itah, atawa mambaleh itah manumon kasalan itah.

¹¹Tapi kilau kagantong langit hunjun intu petak, kilau te kahain sintan Ayuee akan oloh je panumon.

¹²Kilau kakejau timor bara barat, tumon te kakejaue Ie manganan kare dosan itah.

¹³Kilau ijee biti bapa sinta kare anake, tumon te TUHAN sinta dengan oloh je panumon.

¹⁴Awi TUHAN katawan bara en itah jari inampa, Ie mingat je itah toh baya tunek petak.

¹⁵Pambelom olon pandak sama kilau oru; ie mangambang kilau kambang hong kabon;

¹⁶amon inampur riwut, ie lilap, ekae mahin dia ingatawan tinai.

¹⁷Tapi TUHAN tetep sinta oloh je panumon, kahalap Aie aton girir-manggirir

¹⁸akan oloh je mimbing janjin Aie, tuntang baketep malalus parentah Aie.

¹⁹TUHAN marentah hong sorga, Ie raja je barakuasa mahunjun taloh samandiai.

²⁰Tara TUHAN, o kare malekat Ayue je menteng, je mahining tuntang malalus parentah Aie.

²¹Tara TUHAN, o kakare taloh belom hong sorga, uras kare rewar Ayue je malalus kahandak Aie.

²²Tara TUHAN, o hapus taloh je injapa hong hapus wilayah kuasan Aie. Tara TUHAN, o hambaruangku!