Read Ngaju MASMUR 104 Bible Online

MASMUR 104 - Ngaju bible

MASMUR 104

¹Tara TUHAN, o hambaruangku! Lalehan kahain Aim, o TUHAN, Hatallangku! Ikau hapakaian kahalap tuntang kabungas,

²tuntang hasangkowong kalawa. Ikau mambirang langit sama kilau kemah,

³tuntang mamangun Humam intu hunjun danum intu langit.[56] Kare baunandau inampa awim jadi kareta Aim, Ikau manongkang palapas riwut.

⁴ Riwut inampa Awim jadi saroham tuntang kilat jadi palayan Aim.

⁵Ikau mengkepan petak segah hunjun galange, sampai katatahie dia tau kareh hongge.

⁶Ikau manyangkulep jete hapan tasik lombah, danume mampaleteng kare tantan bukit gantong.

⁷Katika Ikau balait, danum te mahasor, mahasor badehes awi gotok auh Aim.

⁸Danum mahasor mahalau kare bukit akan janah, akan eka je inyadia Awim akae.

⁹Ikau manukas kare helat je dia tau ihalaue, uka ela haluli mampaleteng petak.

¹⁰Ikau mawi tampurus tahasak danum intu kare janah. Anak sungei mahasor helat kare bukit,

¹¹hapa mampihop kare meto hong tana, tuntang manganan teah belai kare kalidai parak kayu.

¹²Tokep hete kare burong mawi sarangae; ewen mahiau marak kare dawen.

¹³Bara langit Ikau manusoh ujan intu kare bukit gantong, petak kontep dengan hasil gawin Aim.

¹⁴Ikau mambelom oru akan meto, tuntang akan olon kare macam taloh imbul. Palus ie tau nguan pambolan,

¹⁵tuntang mimbit hasil danum anggor je mampangat. Kea undus saitun je mawi baue hanjak, tuntang panginan je manenga akae kaabas.

¹⁶Kare upon kayu ain TUHAN mandino ujan je hakutoh batang seder Libanon je imbul Awie kabuat.

¹⁷Intu hete kare burong manyarangan, kare burong bangau manyarangan hong tantae.

¹⁸Kare bukit gantong jadi eka kambing parak kayu; palanduk manyahokan intu batu karang.

¹⁹Ikau mawi bulan jadi tanda katika, matanandau katawan katikae belep.

²⁰Amon Ikau manyoho kaput, andau hamalem, tuntang uras meto parak kayu malayap.

²¹Kare singa tebela mangaruntong manggau panginae, balaku panginan je inyadia Hatalla.

²²Amon matanandau lembut ewen manyare tuntang menter intu eka ewen manyahokan.

²³Palus olon balua uka nguan taloh gawie, tuntang tarus bagawi sampai sanja.

²⁴Lalehan kare gawin Aim o TUHAN, uras taloh gawin Aim ilalus hapan kapintar kaharati; kalunen kontep dengan taloh je injapa Awim.

²⁵Keleh mite tasik lombah je hambirang, dengan taloh belom hai korik dia taraise.

²⁶ Intu hete kare kapal balayar; tuntang Lewiatan, naga tasik tampan Aim busik.[57]

²⁷Uras ewen manaharep Ikau, uka mandino panginan hong katikae.

²⁸Ikau manenga, tuntang ewen manampunae, Ikau manyadia, tuntang ewen kumae sampai besoh.

²⁹Amon Ikau mules, ewen mikeh; amon Ikau manduan tahasenge ewen binasa. tuntang haluli jadi tunek petak kilau solake.

³⁰Tapi amon ewen inenga Awim tahaseng,[58] ewen injadian; Ikau manenga pambelom taheta akan petak.

³¹Keleh kahain TUHAN tetep katatahie! Keleh Ie hanjak dengan hapus taloh japan Ayue!

³²Ie manampayah petak tuntang mawie hagenjeh, kare bukit inigunge, sampai asepe balua.

³³Aku nahuang manyanyi akan TUHAN hapus andau pambelomku, manyanyi tara akan Hatallangku katahin aku aton.

³⁴Keleh nyanyingku ingilak Ayue, awi Ie manyanang ateiku.

³⁵Keleh oloh badosa lilap bara hunjun petak, nauhe oloh papa lepah binasa. Tara TUHAN, o hambaruangku! Tara TUHAN!