Read Ngaju MASMUR 105 Bible Online

MASMUR 105 - Ngaju bible

MASMUR 105

¹Keleh manarimakasih akan TUHAN, keleh mambarita kahain Aie, keleh manyarita gawin Aie akan kare bangsa.

²Ambo nyanyi tara akan TUHAN, barita uras gawin Aie je heran.

³Ie TUHAN Ije Barasih Haliai, keleh hanjak rantang awi itah oloh Ayue, uras je manyembah Ie keleh hanjak rantang.

⁴Keleh balaku kaabas bara Ie, keleh sembah Ie harajur.

⁵O turonan Abraham, rewar Aie, tuntang turonan Yakob oloh paintih Ayue, keleh mingat uras taloh heran je ilalus Awie, ela kalapean kare auh tukas Aie.

⁷TUHAN te Hatallan itah, tukas Aie ilalus intu hapus kalunen.

⁸Ie harajur mingat janjin Aie, janji je ihapan palus katatahie.

⁹ Janji te Iawie dengan Abraham, tuntang limbah te dengan Isaak;

¹⁰ palus indehen Awie dengan Yakob, jadi janji je katatahie akan ungkup Israel.

¹¹Koae, “Tanah Kanaan kare hinenga-Ku akan keton, jadi pusaka ain keton.”

¹²horan ungkup Hatalla belom kilau oloh bangsa luar intu hete jumlah ewen isut bewei.

¹³Ewen manamuei bara bangsa ije akan bangsa je beken, bindah bara ije lewu akan lewu je beken.

¹⁴ Tapi TUHAN dia manalua ewe-eweh bewei je manindas ewen; tagal ewen maka kare raja impingat Awie.

¹⁵“Ela mangaraen kare oloh paintih-Ku, ela mawi kapapa akan kare nabi ayung-Ku!”

¹⁶ TUHAN mampadumah lau intu lewu te, tuntang manduan uras panginan je ingkes.

¹⁷ Tapi Ie manyoho ije biti manyanselo ewen, Yosep je jari injual kilau rewar.

¹⁸ Paie imeteng hapan tali pasong, uyate inyaling hapan rantai sanaman.

¹⁹Kajariae manjadi taloh je inujume, ie imbujur awi auh TUHAN.

²⁰ Palus raja Misir, panguasa kare bangsa, maliwus ie bara penjara.

²¹ Ie inyarah gawi nantuani istana, tuntang inenga kuasa hunjun salepah ramon panataue;

²²tuntang kuasa akan mator kare pagawai raja, tuntang mamimpin jalahan oloh je baka-bakas.

²³ Balalu Yakob haguet akan Misir tuntang manetep intu hete kilau oloh bangsa beken.

²⁴ TUHAN mawi ungkup Ayue sasar are, sampai ewen labih abas bara musohe.

²⁵Ie mobah atei oloh Misir sampai manyingi ungkup Ayue tuntang tulas dengan kare rewar Aie.

²⁶ Palus ie manyoho Moses rewar Ayue tuntang Aron oloh paintih Aie.

²⁷Intu Misir ewen mawi kare taloh heran kare gawi je hai bara TUHAN,

²⁸ tuntang ewen manumon kare parentah Aie. Balaku TUHAN mawi lewu te kaput pijem.

²⁹ Sungei ewen iobah Awie jadi daha, sampai uras lauk huange matei.

³⁰ Bakatak magas intu lewun ewen, malahan tame istana ain raja.

³¹ Awi parentah Hatalla dumah kare langau, tuntang kare nyamok sabak intu hapus lewu.

³² Ie manusoh es gantin ujan, tuntang mampadumah kilat je manyabintir.

³³Ie mampalihang upon anggor tuntang upon ara, tuntang mampalihang uras kare upon kayu ain ewen.

³⁴ Awi parentah Aie dumah sangkalap, jumlahe paham are, dia taraise.

³⁵Ewen kuman uras taloh imbul hong tana, tuntang kuman lepah hapus hasil petak.

³⁶ Palus Ie mampatei anak hatue je bakas huang genep keluarga oloh Misir.

³⁷ Limbah te bangsa Israel iagah Awie balua ewen mimbit amas tuntang perak; urase je barigas tuntang abas.

³⁸Oloh Misir buah kikeh tuntang kasabanen jadi ewen sanang, katika oloh Israel haguet.

³⁹ Hatalla mambirang baunandau akan manganjungen ungkup Ayue, tuntang apui akan kalawa amon hamalem.

⁴⁰ Ewen balaku, palus inyoho Awie dumah burong sasintar, ewen inenga Awie rote bara sorga sampai besoh.

⁴¹ Inyila Awie bukit batu, palus mamancar danum je mahasor kilau sungei hong padang pasir.

⁴²Awi TUHAN mingat janjin Aie akan Abraham, rewar Ayue.

⁴³Ie magah ungkup Ayue dengan kahanjak, kare oloh paintih Aie dengan basasurak.

⁴⁴ Petak kare bangsa inenga akan ewen kare tanan ewen inenga Awie akan ungkup Ayue,

⁴⁵mangat ungkup Ayue te manumon kare hukum Aie tuntang malalus kare parentah Aie. Tara TUHAN!