Read Ngaju MASMUR 106 Bible Online

MASMUR 106 - Ngaju bible

MASMUR 106

¹Tara TUHAN! Keleh manarimakasih akan TUHAN awi Ie bahalap; sintan Ayue katatahie.

²Ewen tau mambrita kamenteng TUHAN, tuntang manara Ie dengan patut?

³Salamat oloh je manumon kare parentah Ayue, tuntang halajur adil hong gawie.

⁴Ingat aku, o TUHAN, tagal kataum dengan ungkup Aim, dohop aku kea amon Ikau manyalamat ewen.

⁵Keleh aku mite kasanang kare oloh paintih Aim tuntang hanjak rantang hayak ungkup Aim. Keleh aku tara-tara tuntang hanjak hayak kare oloh Ayum.

⁶Ikei jari badosa kilau tato hiang ikei; ikei jari mawi kapapa tuntang kadarhaka.

⁷ Katika intu Misir tato hiang ikei dia haratie; gawin Aim je heran dia ewen kasenee. Ewen kalapean dengan sintan Aim je hakutoh, tuntang tokep Tasik Raruju harajur ewen mambarontak malawan Je Pangkahai.[59]

⁸Tapi TUHAN manyalamat ewen tagal Arepe kabuat, mangat kamenteng Aie babala.

⁹ Awi perentah Ayue Tasik Raruju palus teah, Ie mimbit ungkup Ayue mananjong mahalau tasik, sama kilau mahalau padang pasir.

¹⁰Tumon te Ie manyalamat ewen bara lengen musoh, Ie maliwus ewen bara kuasan musoh.

¹¹Tapi danum mampaleteng musoh ewen; ije mahin jaton je batisa.

¹² Palus ungkup Ayue percaya dengan janjin Aie tuntang manyanyi tara Akae.

¹³Tapi ewen salenga mangalapean gawin TUHAN tuntang malalus tukas ewen jaton balaku nasehat bara Ie.

¹⁴ Intu padang pasir ewen iamok kipen, tuntang mancoba Hatalla.

¹⁵Ie manenga taloh je ilaku ewen, tapi panyakit kea je buah ewen.

¹⁶ Hong padang pasir te ewen bahiri dengan Moses tuntang dengan Aron rewar Aie je barasih.

¹⁷Palus petak basila manelen Datan, manyangkulep Abiram tuntang keluargae.

¹⁸Apui mohon manyambar akan kalompok ewen, mangehu uras oloh je jari mandarhaka.

¹⁹ Intu bukit Sinai ewen manampaanak sapi amas, tuntang manyembah hampatong toangan te.

²⁰Ewen manakiri Hatalla je pangkahai dengan hampatong sapi je panguman oru.

²¹Ewen kalapean Hatalla panyalamat ain ewen je mawi karetaloh hai intu Misir.

²²Manarewen toto kare gawin Aie intu lewu te, puna mampahengan kare gawin Ayue intu Tasik Raruju.

²³Hatalla nahuang mambina saungkup Ayue, tapi ihambang awi Moses, oloh paintih Ayue. Moses jadi oloh helat akan ewen, sampai kasangit Hatalla tende.

²⁴ Limbah te ewen manolak lewu je bahalap te awi dia percaya dengan janjin Hatalla.

²⁵Ewen bakotok huang kemah ewen tuntang dia maku mahining auh TUHAN.

²⁶Palus hapan sumpah Ie hajanji, akan mampatei ewen intu padang pasir.

²⁷ Turonan ewen akan inganan marak kare bangsa tuntang imisah-darai intu lewun oloh bangsa luar.

²⁸ Limbah te intu Peor ewen manyembah Baal, tuntang kuman parapah akan kare dewa.

²⁹Gawi te mawi kasangit TUHAN sampai ewen buah panyakit je bakaike-ikeh.

³⁰Tapi Pinehas harikas mahukum oloh je sala, palus panyakit te terai.

³¹Gawi te ianggap akae kilau jasa tuntang ingenang katatahie.

³² Intu kare kalin danum Meriba ewen mawi TUHAN sangit, tuntang manyusahMoses dengan gawin ewen.

³³Ewen mawi ateie manyasal, sampai ie hakotak dia mahapan tiroke.

³⁴ Kare bangsa beken dia ewen mampalomose sama kilau je irentah awi TUHAN.

³⁵Ewen belom hewoi haream dengan kare bangsa te, tuntang manyonto karecara oloh je dia kasene Hatalla.

³⁶Palus ewen manyembah kare hampatong dewa, tuntang Jete je mambuku ewen manjato.

³⁷ Ewen mampatei kare anak ewen akan kare hampatong dewa Kanaan.

³⁸ Ewen manusoh dahan oloh je dia sala, dahan kare anak ewen kabuat, uka iluput akan kare hampatong dewa; sampai lewu te imapa awi ewen.

³⁹Tagal kare gawi te ewen imapa, tuntang dia baketep dengan Hatalla.

⁴⁰ Palus kasangit TUHAN hasep dengan ewen, Ie bajilek dengan kare oloh Ayue kabuat.

⁴¹Balalu Ie manyarah ewen akan kare bangsa, Ie manalua ewen inguasa awi musoh.

⁴²Ewen inindas awi kare musoh ewen, tuntang inguasa awi oloh beken.

⁴³Lula-luli TUHAN mambebas ewen, tapi ewen labih rajin mambarontak, sampai ewen binasa huang kare dosan ewen.

⁴⁴Tapi TUHAN mahining kariak ewen, Ie mangatawan kasusah ewen.

⁴⁵Tagal ewen Ie mingat janjin Aie tuntang manyayang ewen tagal sintan Ayue ije hai.

⁴⁶Ie mawi ewen iasi awi uras kare oloh je manawan ewen.

⁴⁷ Keleh manyalamat ikei, o TUHAN, Hatallan ikei, keleh mamumpong ikei bara marak kare bangsa, uka ikei tau manarimakasih tuntang manara Aram je barasih.

⁴⁸Tara TUHAN, Hatallan Israel, toh palus katatahie. Keleh uras oloh hamauh, “Amen!” Tara TUHAN!