Read Ngaju MASMUR 107 Bible Online

MASMUR 107 - Ngaju bible

MASMUR 107

¹ “Keleh manarimakasih akan TUHAN awi Ie bahalap, sintan Aie sampai katatahie.”

²Sewut Jete lula-luli, o keton je jari inyalamat bara kasusah.

³Keton jari imumpong bara kare lewun oloh luar, bara timor tuntang barat, utara tuntang salatan.[60]

⁴Aton je manamuei intu padang himba, layang bara eka melai intu kota.

⁵Ewen balau tuntang teah belai, tuntang nihau kakare kaharap.

⁶Huang kasusah ewen mantehau TUHAN, tuntang Ie maliwus ewen bara kajake.

⁷Ie mangagalan ewen mahalau jalan bujur akan eka melai intu kota.

⁸Patut ewen manarimakasih akan TUHAN awi asin Aie, awi kare gawin Aie je bakahera-heran akan olon.

⁹Awi Ie manganan kateah belai oloh, tuntang mambesoh oloh balau hapan kakare taloh bahalap.

¹⁰Aton oloh je asi-asi melai huang kakaput, oloh je inawan je buah kapehe awi pasong sanaman,

¹¹awi ewen jari mambarontak malawan Hatalla tuntang dia paduli parentah Je Pangkahai.

¹²Ie mamparamok atei ewen hapan gawi babehat; ewen manjato tuntang jaton je mandohop.

¹³Huang kasusah ewen mantehau TUHAN, tuntang Ie maliwus ewen bara kajake.

¹⁴Ie mimbit ewen balua bara kakaput, tuntang manggeto pasong bara ewen.

¹⁵Patut ewen manarimakasih akan TUHAN awi asin Aie, tagal gawin Aie je heran akan olon.

¹⁶Awi ie manelak kare bauntonggang tambaga, tuntang mamparotek kare huit sanaman.

¹⁷Aton je bureng tuntang kapehe awi kare dosan ewen, hayak ingapehe awi kasalan ewen.

¹⁸Ewen peda belaie dengan kare panginan, pampatei ewen jari tokep.

¹⁹Huang kasusah ewen mantehau TUHAN, tuntang Ie maliwus ewen bara kajake.

²⁰Ie mampekeleh ewen hapan parentah Aie, tuntang maliwus ewen bara rumbak kubur.

²¹Patut ewen manarimakasih dengan TUHAN awi Asie, awi kare gawin Aie je heran akan olon.

²²Keleh ewen manarimakasih awie mimbit parapah, tuntang mambarita gawin Aie dengan kare nyanyi kahanjak.

²³Aton tinai je mangombang tasik hapan kapal, uka satiar hong tasik je lombah.

²⁴Ewen mite kare gawin TUHAN, gawin Aie je heran intu tasik.

²⁵Awi parentah Ayue riwut barat manampur tuntang mawi galombang hagotok habeneh.

²⁶Kare kapal taambong ganto-gantong, palus ihantak akan penda tasik. Kare oloh nihau kahanyie manaharep bahaya kahain te.

²⁷Ewen pehe takoloke tuntang ruyung-rayang kilau oloh babusau tuntang nihau tirok pikire.

²⁸Huang kasusah ewen mantehau TUHAN tuntang Ie maliwus ewen bara kajake.

²⁹Riwut barat je mamok manjadi taduh Awie. kare galombang kea tende.

³⁰Ewen sanang awi riwut barat jari terai; Ie mimbit ewen akan palabuhan je inalih.

³¹Patut ewen manarimakasih akan TUHAN awi Asie, awi kare gawin Aie je heran akan olon.

³²Ewen mambarita kahain TUHAN intu bentok ungkup Ayue, tuntang manara Arae huang pumpong jalahan oloh bakas.

³³Kare sungei iobah Awie jadi padang pasir tahasak danum jadi petak keang.

³⁴Petak je bajewong injadian Awie padang taloh bakahing, awi kapapan kare oloh je melai hete.

³⁵Padang pasir iobah Awie jadi talaga, petak keang jadi tahasak danum.

³⁶Ie mina kare oloh balau intu hete; ewen mampendeng kota akan eka ewen melai.

³⁷Ewen manawor binyi huang kare tana tuntang mimbul upon anggor, palus mamumpong hasil je hakutoh.

³⁸TUHAN manenga akan ewen are anak, tuntang meto ain ewen tarus manak-manaka.

³⁹Tapi ewen impakalah tuntang batisa isut awi kapehe tuntang panindasan je paham tulas.

⁴⁰TUHAN mamparandah kare panguasa ain ewen, tuntang manyoho ewen manamuei intu padang je jaton bara jalan.

⁴¹Tapi oloh je belom susah iliwus bara kasusah ewen, kaluarga ewen mandahang kilau kawan tabiri.

⁴²Oloh bujur ateie mitee tuntang hanjak, tapi oloh papa imbenyem.

⁴³Keleh oloh pintar harati manirok uras kare taloh te tuntang mangaku je TUHAN tetep sinta.