Read Ngaju MASMUR 109 Bible Online

MASMUR 109 - Ngaju bible

MASMUR 109

¹Akan pamimpin koor. Masmur Dawid. O Hatalla je harajur inaraku, ela manyuni.

²Awi aku inyarang oloh papa tuntang panipu je manyiar kare sarita tanjaro tahiu aku.

³Ewen manyarang aku dengan auh kontep kasingi, tuntang mamarang aku dia bara buku sabab.

⁴Ewen mandawa aku aloh aku sinta ewen, tuntang jari balakudoa akan ewen.

⁵Ewen mamaleh kahalapku hapan kapapa, tuntang sintangku hapan kasingi.

⁶Keleh mangkat oloh papa uka mahakim ie, nauhe ie indawa awi musohe.

⁷Nauhe ie ihakim tuntang insanan sala tuntang nauhe lakudoae ianggap dosa.

⁸ Keleh pambelome gulong hapus, tuntang jabatae induan awi oloh beken.

⁹Keleh kare anake jadi nole, tuntang sawae jadi balo.

¹⁰Keleh anake jadi tukang sadakah je manamuei, tuntang iharak[62] bara duroh derep humae.

¹¹Keleh kare ramoe induan awi panagih utang, tuntang hasil pantis ebese induan oloh.

¹²Ela aton oloh je tau dengae, atawa manyayang anake je ilihie.

¹³Keleh uras turonae imbinasa, tuntang arae ingalapean awi turonan je rahian.

¹⁴Keleh kapapa tato hiange tetep TUHAN mingate, tuntang dosan indue dia inganan.

¹⁵Keleh dosan ewen harajur TUHAN mingate, tuntang jaton oloh je mingat ewen hong kalunen.

¹⁶Awi oloh te dia puji mingat uka mamparahan sinta asi. Ie mangapehe oloh je belom susah tuntang kapehe, tuntang mampatei oloh je jaton eka kaharape.

¹⁷Ie rajin manyapa; nauhe ie kabuat buah sapa! Ie dia rajin manenga berkat, keleh akae jaton inenga berkat!

¹⁸Akae gawi manyapa te dia men ih, sama kilau mangkepan bajue. Keleh sapa te tayap sama kilau danum akan bitie, tuntang sama kilau undus akan kare tulange.

¹⁹Keleh sapa te manyangkulep ie sama kilau pakaian, tuntang harajur malingkar ie sama kilau peteng kahang.

²⁰TUHAN, keleh mampalawo hukum te akan oloh je mandawa aku, akan oloh je hakotak papa tahiu aku.

²¹Tapi dohop aku tumon janjin Aim, o TUHAN, Hatallangku, keleh nyalamat aku awi kahalap tuntang sintan Aim.

²²Awi aku belom susah tuntang kapehe, tuntang ateiku bahimang sampai handalem.

²³Aku bilak nihau sama kilau kangkalingen taloh katika halemei, aku ingibar kilau sangkalap.

²⁴Ututku hagenjeh awiku puasa, bitingku jadi paringkong bario.

²⁵ Kare oloh je mite aku manawah aku sambil manggiling takolok.

²⁶Keleh dohop aku, o TUHAN, Hatallangku, keleh nyalamat aku tumon sintan Aim.

²⁷Palus musohku kareh katawan jete gawin Ayum, iete Ikau TUHAN je mawi jete.

²⁸Aloh ewen manyapa aku, keleh Ikau mamberkat aku. aloh ewen dumah, ewen kareh impahawen; tapi keleh aku, rewar Aim, impahanjak.

²⁹Keleh kare oloh je mandawa aku inawah, tuntang angat kahawen manyangkulep ewen sama kilau jubah.

³⁰Aku handak manara TUHAN hapan hai auh, mambarita Arae hong pumpong ungkup.

³¹Basa ie mambela tuntang manyalamat oloh je belom susah bara ewen je mamutus hukum matei akae.