Read Ngaju MASMUR 115 Bible Online

MASMUR 115 - Ngaju bible

MASMUR 115

¹Dia ikei, o TUHAN, dia ikei, tapi Ikau bewei je patut inara, awi Ikau baketep tuntang tetep sinta.

²Mbuhen kare bangsa musti hamauh, “Hong kueh Hatallan ewen?”

³Hatallan itah aton hong sorga, Ie malalus taloh je eka kahandak Aie.

⁴ Hampatong dewa ain ewen bara amas tuntang perak, tampan lengen olon.

⁵Ewen aton nyamae tapi dia hakotak, aton matae, tapi dia mite.

⁶Ewen aton pindinge tapi dia mahining aton urong tapi dia tau manyingut.

⁷Ewen aton lenge tapi dia tau manggayap, aton pai, tapi dia tau mananjong tuntang jaton auh je tau balua bara balengkonge.

⁸Keleh jaka kalote kajarian[65] oloh je manampae, tuntang uras oloh je percaya dengae.

⁹O Israel harap dengan TUHAN, Ie je mandohop tuntang mangalindong ikau.

¹⁰O kare imam, harap dengan TUHAN. Ie je mandohop tuntang mangalindong keton.

¹¹O oloh samandiai je panumon, harap dengan TUHAN, Ie je mandohop tuntang mangalindong keton.

¹²TUHAN mingat itah tuntang akan mamberkat itah, Ie kareh mamberkat ungkup Israel tuntang kakare imam turonan Aron,

¹³ Ie kareh mamberkat kare oloh panumon, aloh korik aloh hai.

¹⁴Keleh TUHAN manenga are anak, akan keton tuntang turonan keton.

¹⁵Keleh keton imberkat TUHAN, je manampa langit tuntang petak.

¹⁶Langit jete ain TUHAN bewei, tapi petak inenga Awie akan olon.

¹⁷TUHAN dia inara awi oloh matei, awi oloh je jari mohon akan eka je suni.

¹⁸Tapi itah je belom manarimakasih Akae toh palus katatahie. Tara TUHAN!