Read Ngaju MASMUR 118 Bible Online

MASMUR 118 - Ngaju bible

MASMUR 118

¹ Keleh manarimakasih akan TUHAN awi Ie bahalap, sintan Aie palus katatahie.

²Keleh oloh Israel hamauh, “Sintan Aie palus katatahie.”

³Keleh kare imam hamauh, “Sintan Aie palus katatahie.”

⁴Keleh hapus oloh panumon hamauh, “Sintan Aie palus katatahie.”

⁵Huang kajake aku mantehau TUHAN; balalu Ie tombah tuntang maliwus aku.

⁶ Aku dia mikeh awi TUHAN aton dengangku, olon dia aton kuasae mawi aku.

⁷TUHAN mampahayak aku akan mandohop aku, aku kareh mite musohku impakalah.

⁸Labih bahalap bakalindong intuTUHAN, bara maandal olon.

⁹Labih bahalap bakalindong intu TUHAN, bara maharap kare oloh bangsawan.

¹⁰Are musoh mangaliling aku; dengan kuasan TUHAN ewen impakalah awiku.

¹¹Ewen mangapong aku bara hakaliling, dengan kuasan TUHAN aku mampakalah ewen.

¹²Sama kilau bajanyi ewen mangarimbong aku, dengan kuasan TUHAN aku mampakalah ewen. Huang ije kapijep mate ewen imbelep sama kilau apui je mangehu unak duhi.

¹³Aku inyarang bahimat tuntang bilak manjato, tapi TUHAN mandohop aku.

¹⁴ TUHAN jete kaabasku tuntang je inaraku, Ie jari manyalamat aku.

¹⁵Hining surak kamanang intu kare kemah ungkup Ayue, “TUHAN malalus taloh je menteng!

¹⁶Kuasan TUHAN manenga akan itah kamanang TUHAN malalus gawi je menteng!”

¹⁷Aku dia akan matei, tapi tetep belom akan mambrita gawin TUHAN.

¹⁸TUHAN jari mangapehe aku paham, tapi Ie dia manyarah aku akan pampatei.

¹⁹Uap akangku lawang Human TUHAN, mangat aku tame tuntang manarimakasih Akae.

²⁰Jetoh lawang bauntonggang TUHAN, baya oloh bujur ateie tau mahalau jete.

²¹Aku manara Aram awi Ikau manarima lakudoangku; Ikau jari manenga akangku kamanang.

²² Batu je inanganan awi kare tukang pangun jadi indu batu panjeup puting.

²³Jete gawin TUHAN, paham heran akan itah.

²⁴Jetoh andau je inukas TUHAN; keleh itah mawi pesta dengan kahanjak.

²⁵ Ikei balaku, TUHAN, keleh manyalamat ikei, o TUHAN, tenga akan ikei kamanang!

²⁶ Imberkat ie je dumah huang aran TUHAN, ikei mamberkat keton bara Human TUHAN.

²⁷TUHAN te Hatalla, Ie bajenta dengan itah. Keleh miar haya-hayak barami dengan pating kayu hong lenge, tuntang kaliling mesbeh TUHAN.

²⁸Ikau Hatallangku, aku manarimakasih Akam, Hatallangku, aku mampahai Ikau.

²⁹Keleh manarimakasih akan TUHAN, awi Ie bahalap, sintan Aie palus katatahie.