Read Ngaju MASMUR 119 Bible Online

MASMUR 119 - Ngaju bible

MASMUR 119

¹Salamat oloh je pambelome tinduh tuntang manumon kare hukum TUHAN.

²Salamat oloh je manumon parentah Ayue, tuntang dengan salepah atei manggau jalan mangasene TUHAN.

³Salamat oloh je manumon kahandak TUHAN, tuntang dia malalus taloh papa.

⁴Ikau manenga akan ikei hukum Aim, o TUHAN, uka ikei malalus jete dengan kaketep.

⁵Keleh aku dengan atei je dehen, manuntut kare atoran Aim.

⁶Amon aku manantuani uras kare parentah Aim, maka aku dia impahawen.

⁷Amon aku bajar kare auh tukas Aim je adil aku manara Ikau dengan kahias atei.

⁸Aku nahuang manumon hukum Aim, ela ah samasinde malihi aku.

⁹Oloh tabela tau mahaga pambelome barasih amon ie belom manumon kare parentah Aim.

¹⁰Dengan salepah atei aku nahuang kasene Ikau, ela nalua aku mahiwang bara parentah Aim.

¹¹Auh ajar Aim ingkesku huang ateiku, uka aku dia badosa Dengam.

¹²Aku manara Ikau, o TUHAN, keleh majar aku atoh Aim.

¹³Hapan hai auh aku mansanan uras hukum je inenga Awim.

¹⁴Aku hanjak manuntut parentah Aim, sama kilau oloh je tempon kare macam panatau.

¹⁵Aku handak bajar kare auh tukas Aim, tuntang malalus kare atoh Aim.

¹⁶Kare tukas Aim mawi aku sanang; auh ajar Aim dia akan ingalapeangku.

¹⁷Keleh Ikau masi rewar Aim toh, mangat aku belom tuntang manumon auh ajar Aim.

¹⁸Keleh muap matangku mangat aku mite auh ajar je heran hong hukum Aim.

¹⁹Baya hanjulo aku melai hong kalunen, ela manyahokan hukum Aim bara aku.

²⁰Ateiku pehe mananggong kataharon atei, aku handak mangatawan hukum Aim genep katika.

²¹Ikau maningak oloh je bajoho, tuntang manyapa oloh je mahiwang bara parentah Aim.

²²Keleh paliwus aku bara auh tawah tuntang auh hababaka ain ewen, awi aku malalus atoran Aim.

²³Aloh kare panguasa pakat malawan aku, rewar Aim toh akan mangumang atoran Aim.

²⁴Kare atoran Aim jadi panasehat akangku je manyanang ateiku.

²⁵Aku menter intu petak; halalian pambelomku tumon janjin Aim.

²⁶Aku mangaku gawingku, palus Ikau tombah auhku; keleh majar aku kare tukas Aim.

²⁷Dohop aku mangatawan kare hukum Ayum, auh ajar Aim[66] je heran kareh ingumangku.

²⁸Hambaruangku hancor buah kasusah, paabas aku tumon janjin Aim.

²⁹Keleh mangejau aku bara jalan je layang, tagal kahalap Aim, keleh ajar aku hukum Aim.

³⁰Aku jari mintih uka manumon parentah Aim harajur ingenangku.

³¹Aku jari manumon kare atoran, o TUHAN ela manalua aku impahawen.

³²Dengan kasanang atei aku akan manumon parentah Aim, awi Ikau mawi aku labih harati.

³³TUHAN, keleh ajar aku riman kare tukas Aim, uka aku manuntut jete sampai hapus.

³⁴Awi aku harati hukum Aim uka inumongku, tuntang ilalusku dengan salepah ateiku.

³⁵Keleh aku dehen mimbing parentah Aim, awi jete karajin aingku.

³⁶Tenga akangku kanahuang uka manumon atoran Aim, malabien bara kanahuang uka jadi tatau,

³⁷haga aku uka ela mangoang taloh je hayang, tenga akangku pambelom tumon kahandak Aim.

³⁸Keleh mandehen dengan rewar Aim toh janjin Aim, je inenga Awim akan oloh je manumon auh Aim.

³⁹Keleh mangejau auh tawah je ingikehku, awi toto bahalap hukum Aim.

⁴⁰Tenga akangku pambelom taheta awi Ikau adil, aku nahuang manumon kare tukas Aim.

⁴¹O TUHAN, keleh mamparahan lalehan kapaham Ikau sinta aku, keleh nyalamat aku tumon janjin Aim.

⁴²Palus aku tau tombah auh oloh je manawah aku, awi aku maandal auh Aim.

⁴³Dohop aku uka harajur mangotak taloh je toto, awi aku harap auh tukas Aim.

⁴⁴Aku handak mimbing hukum Aim, palus katatahie.

⁴⁵Maka aku kareh belom dengan bebas, awi nahuang manumon auh ajar Aim.

⁴⁶Atoran Aim kareh imbaritaku akan kare raja, tuntang aku dia kareh mahamen.

⁴⁷Karajingku iete malalus parentah Aim, awi aku sinta jete.

⁴⁸Aku mahormat tuntang sinta parentah Aim, auh tukas Aim kareh ingumangku.

⁴⁹Ingat janjin Ayum dengan rewar Aim toh, janji je manenga kaharap akangku.

⁵⁰Jetoh je mampong aku hong kapehengku, iete janji te manenga akangku pambelom.

⁵¹Oloh bajoho paham manawah aku tapi aku dia mahiwang bara hukum Aim.

⁵²Aku mingat hukum Aim je aton bara horan, palus ateiku iampong, o TUHAN.

⁵³Aku sangit toto dengan oloh papa, awi ewen malihi hukum Aim.

⁵⁴Katahin pambelomku je pandak hong hunjun petak, auh tukas Aim iawiku jadi auh kare nyanyi tara.

⁵⁵Metoh hamalem aku mingat Ikau, o TUHAN, hukum Aim tetep imbingku.

⁵⁶Aku tau mandino kasanang awi aku manumon kare parentah Aim.

⁵⁷Ikau bewei je eka kanahuangku, o TUHAN, aku hajanji handak malalus auh ajar Aim.

⁵⁸Dengan salepah ateiku aku balaku Asim, pasi aku tumon janjin Aim.

⁵⁹Aku jari manirok hadat dasar aingku, tuntang hajanji manumon parentah Aim.

⁶⁰Aku kaje-kajeng tuntang dia mentai uka malalus parentah Aim.

⁶¹Oloh papa manenan jarat akangku, tapi aku dia kalapean hukum Aim.

⁶²Bentok alem aku handak misik manara Aram, awi kare auh tukas Aim je adil.

⁶³Aku hasobat dengan uras oloh je panumon, uras oloh je malalus parentah Aim.

⁶⁴Petak toh kontep awi sintan Aim, o TUHAN, keleh ajar aku kare auh tukas Aim.

⁶⁵Ikau jari manggenep janjin Aim, o TUHAN, tuntang mawi kahalap akan rewar Aim.

⁶⁶Tenga akangku kapintar dengan pangatawan awi aku percaya dengan kare parentah Aim.

⁶⁷Helo bara ihukum aku mahiwang, toh aku mimbing parentah Aim.

⁶⁸Awi Ikau bahalap tuntang malalus kahalap, keleh ajar aku kare auh tukas Aim.

⁶⁹Oloh bajoho mamapa aku, tapi aku dengan salepah atei manumon parentah Aim.

⁷⁰Kare oloh te dia harati, tapi akangku hukum Aim manyanang atei.

⁷¹Puna bahalap Ikau mahukum aku, uka aku kasene auh tukas Aim.

⁷²Akangku hukum Aim labih barega, bara kakare amas tuntang perak hong kalunen.

⁷³Ikau wei je manjadian tuntang manampa aku, keleh tenga akangku kaharati, hapa bajar kare parentah Aim.

⁷⁴Oloh panumon kareh sanang amon mite aku, awi aku harap janjin Aim.

⁷⁵Aku katawan je auh tukas Aim adil, o TUHAN, Ikau jari mahukum aku awi kaketep Aim.

⁷⁶Keleh sintan Aim jadi ampong akangku, awi tumon te janjin Aim dengan rewar Aim.

⁷⁷Keleh pasi aku, maka aku tetep belom, awi hukum Aim manyanang ateiku.

⁷⁸Keleh oloh bajoho mahamen, awi jari mamapa aku, tapi aku kareh mangumang kare parentah Aim.

⁷⁹Keleh oloh panumon manalih aku, uras oloh je kasene kare atoran Aim.

⁸⁰Keleh ateiku dia mahiwang bara auh tukas Aim, mangat aku ela mahamen.

⁸¹Ateiku paham taharu dengan salamat je bara Ikau, aku harap janjin Aim.

⁸²Matangku heka mentai Ikau manggenep janjin Aim, aku hamauh, “Hamparea Ikau kareh mampong aku?”

⁸³Upak bitingku kambareut kilau kantong anggor je kupit, tapi auh tukas Aim dia ingalapeangku.

⁸⁴Sampai hamparea rewar Aim musti sabar? Hamparea Ikau kareh mahukum kare oloh je manggoang aku?

⁸⁵Oloh je dia manumon hukum Aim, jari mangali lowang akan manjabak aku.

⁸⁶Uras hukum Aim tau iandal, dohop aku, awi aku inggoang jaton bara buku sabab.

⁸⁷Karenga ih ewen bahasil mampatei aku, tapi aku dia manalua parentah Aim.

⁸⁸Keleh nyalamat aku awi Ikau tetep sinta, mangat aku tau manumon hukum Aim.

⁸⁹TUHAN, auh Aim dehen katatahie hong sorga.

⁹⁰Kaketep Aim harajur aton, Ikau mampendeng petak badehen, sampai harajur aton.

⁹¹Uras taloh je aton katika toh, aton awi parentah Aim, awi ewen te uras kare rewar Aim.

⁹²Jaka hukum Aim dia eka kahanjakku, pasti aku jari matei huang kapehengku.

⁹³Katatahie aku dia manalua parentah Aim, awi dengan jete Ikau mambelom aku.

⁹⁴Keleh nyalamat aku awi aku toh Ayum, aku jari nguan gawingku manumon auh tukas Aim.

⁹⁵Oloh papa mimpa handak mampatei aku, tapi aku handak malalus hukum Aim.

⁹⁶Gitangku taloh je tinduh barasih mahin aton baratikas, baya parentah Aim je tinduh barasih.

⁹⁷Paham aku sinta hukum Aim; aku mangumange hapus andau.

⁹⁸Aku harajur mingat parentah Aim, je mawi aku labih pintar bara kare musohku.

⁹⁹Kaharatingku labih bara kaharatin kare gurungku, awi aku mangumang kare parentah Aim.

¹⁰⁰Aku labih katawan bara kare oloh bakas, awi aku mimbing kare auh tukas Aim.

¹⁰¹Ihakangku kare gawi papa, mangat aku manumon kare auh ajar Aim.

¹⁰²Aku dia manalua hukum Aim, awi Ikau je majar aku.

¹⁰³Lalehan kamanis auh Aim, angate labih manis bara mado!

¹⁰⁴Kare hukum Aim manenga akangku kaharati sampai aku basingi dengan gawi je tulas.

¹⁰⁵Auh Aim jete sumbo akan jalangku, kalawa hapa manyingah jalangku.

¹⁰⁶Je injanjiku hapan sumpah kareh inggenepku, uka mimbing auh tukas Aim je adil.

¹⁰⁷Aku paham kapehe, o TUHAN, haga pambelomku tumon janjin Aim.

¹⁰⁸Tarima lakudoa tarimaksihku, o TUHAN, tuntang ajar aku kare hukum Aim.

¹⁰⁹Aku harajur selang matei, tapi aku [67] dia kalapean hukum Aim.

¹¹⁰Oloh papa manenan parangkep akangku tapi aku dia mahiwang bara auh tukas Aim.

¹¹¹Parentah Aim jete pusaka akangku katatahie, je manyanang ateiku.

¹¹²Aku nahuang manumon tukas Aim sampai hapus umurku.

¹¹³Aku sinta dengan kare hukum Aim, inyingiku oloh je dia toto baketep Dengam.

¹¹⁴Ikau pambela tuntang palindong aingku, aku harap janjin Aim.

¹¹⁵O oloh papa, keleh kejau bara aku! Aku handak manumon parentah Hatallangku.

¹¹⁶Keleh paabas aku tumon janjin Aim mangataku belom, ela manalua akukorik atei hong kaharapku.

¹¹⁷Imbing aku mangat aku salamat, tuntang harajur malalus parentah Aim.

¹¹⁸Ikau manolak oloh je mahiwang bara tukas Aim, hayang bewei tipun ewen.

¹¹⁹Uras oloh papa itongku kilau rotik, awi te aku sinta kare atoran Aim.

¹²⁰Aku hagenjeh awi mikeh Dengam, ateiku mikeh dengan auh tukas Aim.

¹²¹Aku jari malalus taloh je adil tuntang bujur, ela manyarah aku akan lengen musoh.

¹²²Hajanji je Ikau kareh mandohop aku, ela manalua aku ihenyek awi kare oloh bajoho.

¹²³Matangku hakarah mentai pandohop Aim je manyalamat, aku mentai kaliwus je injanji Awim.

¹²⁴Keleh mawi aku tumon sintan Aim, ajar aku auh tukas Aim.

¹²⁵Aku rewar Aim, keleh mawi aku jadi oloh harati, mangat aku katawan parentah Aim.

¹²⁶TUHAN, sampai katikae Ikau mambaleh awi kare oloh malanggar kare hukum Aim.

¹²⁷Kare parentah Aim inyintaku labih bara amas, malabien bara amas tulen.

¹²⁸Awi te aku belom tumon uras atoh Aim; gawi je mahiwang inyingiku.

¹²⁹Kare atoran Aim toto heran, inumongku dengan salepah atei.

¹³⁰Amon inarang, auh ajar Aim mampalawa, manenga kaharati akan oloh je naniha.

¹³¹Tahasengku sewa-sewat awi taharu dengan paretah Aim.

¹³²Keleh mules nampayah aku tuntang pasi aku, sama kilau Ikau masi oloh je sinta Ikau.

¹³³Keleh manyegah tanjongku tumon janjin Aim, ela manalua aku inguasa awi kapapa.

¹³⁴Paliwus aku bara kare oloh je mahenyek aku, mangat aku tau manumon parentah Aim.

¹³⁵Keleh mamberkat aku dengan panumah Aim, tuntang ajar aku hapan auh tukas Aim.

¹³⁶Danum matangku mahasor sama kilau sungei, awi hukum Aim dia inumon.

¹³⁷Ikau adil, o TUHAN, uras hukum Aim buah.

¹³⁸Kare parentah je inenga Awim adil tuntang tau iandal.

¹³⁹Kasangitku hasep huang bitingku awi musohku mangalapean auh ajar Aim.

¹⁴⁰Janjin Aim dehen tuntang tau imercaya, aku paham sinta jete.

¹⁴¹Aku toh korik tuntang hina tapi aku dia malihi auh ajar Aim.

¹⁴²Katetek ayum belom katatahie, tuntang hukum Aim harajur toto bujur.

¹⁴³Aku intakan kasusah tuntang kajake, tapi auh tukas Aim manyanang ateiku.

¹⁴⁴Atoran Aim harajur adil; tenga akangku kaharati mangat aku belom.

¹⁴⁵Dengan salepah atei aku mantehau Ikau; keleh tombah aku o TUHAN, aku handak manumon parentah Aim.

¹⁴⁶Aku mantehau Ikau, keleh manyalamat aku, aku handak mimbing atoran Aim.

¹⁴⁷Hanjewu aku misik tuntang mantehau balaku dohop; aku harap janjin Aim.

¹⁴⁸Hapus alem aku misik, akan mangumang auh ajar Aim.

¹⁴⁹Hining auhku awi sintan Aim, o TUHAN, jaga pambelomku awi kaadil Aim.

¹⁵⁰Oloh je mangoang aku jari tokep, ewen aton kahimat papa, tuntang dia paduli hukum Aim.

¹⁵¹Tapi Ikau tokep, o TUHAN, kare parentah Aim bujur toto.

¹⁵²bara bihin aku katawan bara kare auh ajar Aim, je Ikau manukas jete sampai katatahie.

¹⁵³Ite kapehengku tuntang nyalamat aku, awi aku dia manalua hukum Aim.

¹⁵⁴Keleh mambela pakarangku tuntang paliwus aku; keleh manyalamat aku tumon janjin Aim.

¹⁵⁵Oloh papa dia kareh inyalamat, awi dia manumon auh tukas Aim.

¹⁵⁶Toto paham hai asim, o TUHAN, nyalamat aku tumon katetek Aim.

¹⁵⁷Are oloh mamusoh tuntang manggoang aku, tapi aku dia manalua atoran Aim.

¹⁵⁸Aku basingi mite kare oloh darhakate, awi ewen dia manumon auh ajar Aim.

¹⁵⁹Ite kapahamku sinta atoran Aim, o TUHAN, keleh nyalamat aku awi sintan Aim.

¹⁶⁰Uras auh Aim toto, samandiai hukum Aim je adil te ihapan katatahie.

¹⁶¹Kare oloh je mimbing kuasa manggoang aku jaton bara buku sabab, tapi baya hukum Aim je ingikehku.

¹⁶²Janjin Aim mampahanjak aku, sama kilau oloh je sondau panatau.

¹⁶³Uras tanjaro inyingiku, tapi hukum Aim inyintaku.

¹⁶⁴Aku harajur manarimakasih intu Ikau, awi hukum Aim je adil.

¹⁶⁵Oloh je sinta hukum Aim sanang tuntang damai, jaton je tau mahambang ewen.

¹⁶⁶Aku mentai salamat bara Ikau, o TUHAN, kare parentah Aim ilalusku.

¹⁶⁷Aku manumon kare atoran Aim, tuntang sinta jete dengan salepah ateiku.

¹⁶⁸aku manumon parentah tuntang atoh Aim, awi Ikau mite kare gawingku.

¹⁶⁹Keleh auh tehauku sampai Ikau, o TUHAN, tenga akangku kaharati tumon janjin Aim.

¹⁷⁰Keleh auh lakungku sampai Ikau, keleh nyalamat aku tumon janjin Aim.

¹⁷¹Aku handak manara Ikau harajur, awi Ikau majar aku auh tukas Aim.

¹⁷²Aku handak manyanyi tahiu janjin Aim, awi kare parentah Aim adil.

¹⁷³Keleh jaka Ikau harajur pahias mandohop aku, awi aku mintih uka manumon parentah Aim.

¹⁷⁴Ateiku taharu salamat je bara ikau, hukum Aim mampahanjak aku.

¹⁷⁵Keleh aku belom, mangat aku manara Aram, keleh kare auh tukas Aim mandohop aku.

¹⁷⁶Aku layang kilau tabiri je nihau, keleh dumah, tuntang gau rewar Aim toh, awi aku dia manalua kare parentah Aim.