Read Ngaju MASMUR 139 Bible Online

MASMUR 139 - Ngaju bible

MASMUR 139

¹Hapa mamimpin koor. Masmur Dawid. O TUHAN, Ikau harati tahiu bitingku tuntang Ikau kasene aku.

²Ikau katawan kare taloh gawingku; bara kejau Ikau harati kare tirok ateiku.

³Ikau mite aku, aloh aku bagawi atawa malayan kahekaku, Ikau katawan kakare taloh je iawiku.

⁴Aloh helo bara aku hakotak, mahin Ikau katawan taloh je handak insanangku.

⁵Ikau mangaliling aku bara serok sare, tuntang Ikau mangalindong aku hapan kuasan Aim.

⁶Tangkalau kandaleme akangku pangatawan Aim te, dia olihku mandugae hapan tirokku.

⁷Akan kueh aku tau haguet mangat luput bara kuasan Aim? Akan kueh aku tau hadari mangat kejau bara tampayah Aim?

⁸Jaka aku mandai akan langit, Ikau aton intu hete, jaka aku batiroh hong lewun oloh matei, Ikau aton kea intu hete.

⁹Jaka aku tarawang akan hila timor atawa melai intu hila barat je paling kejau,

¹⁰intu hete Ikau mahin mandohop aku; intu hete kea lengen Aim mangagalan aku.

¹¹Jaka aku balaku mangat kakaput mangalukup aku, tuntang kalawa kaliling aku jadi hamalem,

¹²maka kakaput te mahin dia kaput Akam; hamalem jete balawa kilau handau, tuntang kakaput te sama kilau kalawa.

¹³Ikau manjapa kare taloh intu huang bitingku, tuntang manjadian aku huang kanain induku.

¹⁴Aku manara Ikau awi aku paham malabien dia lue-luen. Kare gawin Aim mampahengan tuntang mampajungun aku toto-toto mangatawan jete.

¹⁵Katika kare tulangku injadian, jete inyusun titip tuntang buah huang kanain induku, metoh aku impahai intu hete dengan basilim aku dia basahokan intu tajarep Aim.

¹⁶Ikau mite aku katika aku magon huang kanain induku; kakare taloh te inyurat huang buku Ayum; kare andaue jari inukas helo bara jete nampara, aloh ije.

¹⁷Lalehan kahalie[71] kare tirok Ayu makangku o Hatalla, tuntang lalehan kare haseae!

¹⁸Jaka aku misee, labih are bara pasir, amon aku misik magon kea aku manirok Ikau.

¹⁹Keleh jaka oloh papa impalomos Awim o Hatalla, keleh ngejau bara aku kare oloh je manusoh daha!

²⁰Ewen manyewut taloh je papa tahiu Ikau, tuntang sumpah tanjaro tagal kare lewum.

²¹O TUHAN aku basingi dengan oloh je manyingi Ikau, ateiku manyasal dengan oloh je malawan Ikau!

²²Ewen paham inyingiku, tuntang ewen iitongku kilau musoh.

²³Keleh riksa aku o Hatalla, keleh iriksa kare taloh huang ateiku, riksa aku keleh kare tirokku ingatawan Awim.

²⁴Keleh mite mikeh aton kapapa huang arepku, tuntang ngagalan intu jalan je katatahie.[72]