Read Ngaju MASMUR 143 Bible Online

MASMUR 143 - Ngaju bible

MASMUR 143

¹Masmur Dawid. O TUHAN keleh hining auh lakudoangku, keleh nantuani kare auh lakungku. Keleh tombah auhku tagal kaketep Aim, tarima auh lakudoangku tagal kaadilan Aim.

² Aku toh rewar Aim, ela mahukum aku, awi jaton ije oloh jedia sala intu taharep Aim.

³Musohku jari manggoang aku tuntang mampakalah aku, tuntang manamean aku akan huang penjara je kaput; aku jadi sama kilau oloh je jari tahi matei.

⁴Aku jari nihau enteng huangku, ateiku jari heka.

⁵Aku mingat kare andau je jari halau; aku manirok kakare taloh gawin Aim, aku mangomang kare gawin lengen Aim.

⁶Aku balakudoa intu Ikau sambil mandepe lengengku; sama kilau petak je keang, hambaruangku taharu Dengam.

⁷Keleh nombah auhku bajeleng o TUHAN, awi aku jari bageto kaharap. Ela manyahokan arep Aim bara aku mangat aku dia samakilau oloh je jari mohon akan lewun oloh matei.

⁸Keleh mampingat aku genep hanjewu tahiu sintan Aim, awi aku harap intu Ikau. Keleh parahan akangku jalanje patut ihoroiku awi intu Ikau aku balakudoa.

⁹Aku dumah handak bakalindong Dengam, o TUHAN keleh paliwus aku bara kare musohku.

¹⁰Keleh majar aku malalus kahandak Aim, awi Ikau Hatallangku. Ikau bahalap atei Aim, tuntang akan mangagalan aku intu jalan ije rata.

¹¹Keleh manyalamat aku tumon janjin Aim, o TUHAN, tagal kahalap Aim keleh paliwus aku bara kahapit.

¹²Tagal sintan Aim keleh palomos kare musohku, keleh mambinasa kare oloh je mahenyek aku awi aku rewar Aim.