Read Ngaju MASMUR 144 Bible Online

MASMUR 144 - Ngaju bible

MASMUR 144

¹Bara Dawid. Tara TUHAN, kalindong aingku! Ie majar aku kalahi tuntang majar aku parang.

²Ie wei pandohop tuntang pambela aingku, Ie panyalamat aingku ekaku bakanjungen. Ie mangalindongaku, ekaku babuhau, Ie mawi kare bangsa mamenda aku.

³ TUHAN, eweh kea olon te sampai Ikau manantuani ie? Eweh kea ie te sampai Ikau paduli dengae?

⁴Olon te sama kilau ije kakius riwut, sama kilau kangkalingen taloh je mahalau, kalote wei pambelom aie.

⁵O TUHAN, keleh mambuka langit Aim palus mohon, nigong kare bukit mangat jete hasep.

⁶Jakah kilat Aim mangat musoh imisah darai, keleh malapas panah Aim mangat ewen geger.

⁷Keleh moloh lengen Aim bara sorga, tuntang paliwus aku bara danum soho. Keleh nyalamat aku bara lengen oloh bangsa beken.

⁸je rajin mananjaro tuntang manipu, tuntang mawi sumpah tanjaro.

⁹Aku handak manyanyi nyanyi taheta Akam o Hatalla, tuntang mampahiau kacapi sambil manyanyi.

¹⁰Ikau manenga kamanang akan kare raja, tuntang maliwus Dawid rewar Aim.

¹¹Keleh maluput aku bara padang oloh je tulas; nyalamat aku bara kuasan oloh bangsa beken je rajin mananjaro tuntang manipu, tuntang mawi sumpah tanjaro.

¹²Keleh anak hatue ain itah hong wayah katabelae sama kilau taloh imbul je jari hai. Keleh kare anak bawi ain itah sama kilau tihang kahalap, je mambungas kare eka serok sare hong istana.

¹³Keleh jaka kare gudang itah kontep huange awi kare macam hasil petak. Keleh kare tabirihong padang oru ain itah manak sampai bapuluh koyan karee.

¹⁴Keleh kare sapi ain itah manak manaka tuntang jaton je nihau atawa mangelos. Keleh jaka jaton tarahining auh kasusah kajake intu kare jalan hong lewun itah.

¹⁵Salamat bangsa je kilau te, salamat ungkup je Hatallan ayue te TUHAN!