Read Ngaju MASMUR 145 Bible Online

MASMUR 145 - Ngaju bible

MASMUR 145

¹Auh tara bara Dawid. Aku handak mampahai Ikau, O Hatallangku tuntang Rajangku, tuntang manara Aram sampai katatahie.

²Genep andau aku handak manarimakasih intu Ikau, tuntang mampahai Ikau palus katatahie.

³Basa TUHAN pangkahai tuntang paham inara, kahain Ayue jaton taratuga.

⁴Girir manggirir oloh akan manara kare gawin Aim tuntang mambarita kamenteng Aim.

⁵Ewen akan mambarita kapaham kahain Aim tuntang hormat Aim, gawin Ayum je bakahera-heran akan ingumangku.

⁶Ewen mambarita kare gawin Aim je malabien katamame, kahain Aim akan insanangku.

⁷Oloh akan manyarita kakare kahalap Aim tuntang manyanyi tahiu katetek Aim.

⁸TUHAN te pamasi tuntang panyayang, rangkah balait tuntang harajur masi.

⁹Ie bajenta ateie dengan genep bitin oloh, tuntang masi dengan kare taloh japae.

¹⁰Kakare taloh japan Aim akan manara Ikau, o TUHAN, hapus ungkup Ayu makan manarimakasih intu Ikau.

¹¹Ewen akan mampahai Ikau kilau Raja, tuntang manyarita kamenteng Ayum,

¹²mangat kakare oloh katawan gawin Aim je hai, hayak karajaan Ayum je ihormat tuntang basewut bahalap.

¹³Pamarentah Aim tetep katatahie, kuasan Aim te bunggut girir mangirir. TUHAN baketep dengan kare janjin Aie, Ie kontep asi dengan kare gawin Aie.

¹⁴TUHAN mandohop oloh je huang kasusah, Ie manggatang baun oloh je sontop.

¹⁵Kakare taloh belom maharap Ikau; Ikau manenga panginan akan ewen hong katikae.

¹⁶Ikau manenga kare taloh je imerlu ewen, sampai ewen jaton bara katapas.

¹⁷TUHAN adil huang kare taloh tukas Aie tuntang kontep asin Aie huang kare gawin Aie.

¹⁸Ie tokep dengan oloh je mantehau Ie, tuntang balaku Dengae hapan katoton atei.

¹⁹Ie manyanang atei oloh ije baketep; Ie mahining auh tehau ewen tuntang manyalamat ewen.

²⁰Ie mangalindong genep oloh je sinta Ie, tapi oloh papa imbinasae.

²¹Aku handak harajur manara TUHAN, keleh kare taloh belom Ayue manara aran TUHAN palus katatahie.