Read Ngaju MASMUR 147 Bible Online

MASMUR 147 - Ngaju bible

MASMUR 147

¹Tara TUHAN! Basa manara Arae te bahalap tuntang manyanang uka manyanyi tara Akae.

²TUHAN akan mahalalian Yerusalem; kare oloh tawanan akan iimbit buli Awie.

³Ie mampakeleh oloh je bageto kampongan ateie tuntang mameteng kare himang ewen.

⁴Ie manukas pire kare bintang intu langit, tuntang gagenepe uras inenga aran Awie.

⁵Toto hai tuntang tamam TUHAN itah, kapintar kaharatin Aie jaton bara tikas.

⁶Ie mampendeng oloh je buah katulas, tapi oloh papa inempak Awie akan petak.

⁷Keleh manyanyi auh tara akan TUHAN, pahiau kacapi akan TUHAN itah.

⁸Ie je mambirang baunandau intu langit; Ie manyadia ujan akan petak, tuntang mawi oru tumbo intu bukit.

⁹Ie manenga panginan akan meto, tuntang akan anak burong kak je teha-tehau.

¹⁰Eka karajin TUHAN dia ie kuda je abas; dia kea pahlawan je bahanyi.

¹¹TUHAN rajin dengan oloh je baketep, dengan oloh je harajur maharap Asie.

¹²Tara TUHAN, o Yerusalem! Tara akan Hatallam, o Sion!

¹³Basa Ie mandehen kare bauntonggang lawang, tuntang mamberkat oloh Ayue.

¹⁴Ie manjaga daerah aim mangat tetep aman, tuntang mambesoh ikau hapangandom je paling bahalap.

¹⁵Ie manenga parentah akan petak, tuntang auhe balalu ilalus.

¹⁶Ie mampamohon salju kilau kapas, tuntang manawor ambon baku kilau kawo.

¹⁷Ie mampamohon ujan es kilau batu; jaton ije je olih manyarenan taharep kasadingee.

¹⁸Palus tagal parentah Ayue es te jadi danum; Ie mawi riwut hakius palus danum mahasor.

¹⁹Ie manyampai peteh Aie akan ungkup Ayue, kare atoran tuntang parentah Aie akan ungkup je iintih Awie.

²⁰Ie dia mawi taloh kalote akan kare bangsa beken, ewen dia mangasene kare parentah Aie. Tara TUHAN!