Read Ngaju MASMUR 148 Bible Online

MASMUR 148 - Ngaju bible

MASMUR 148

¹Tara TUHAN! Tara TUHAN, o kare taloh huang sorga! Kakare taloh je melai hong eka gantong, tara akan Arae.

²Tara akan Arae o kare malekat Ayue, keleh tara akan Arae o kakare tantara sorga!

³Tara akan Arae, o matanandau tuntang bulan, tara akan Arae, o kare bintang je bara pinat!

⁴Tara akan Arae, o langit je pangkagantonge, tara akan Arae, o danum intu hunjun langit.[74]

⁵Keleh ewen samandiai manara aran TUHAN, basa kakare taloh samandiai injadian awi parentah Aie.

⁶Ie manukas ekae mije-mije, taloh je jari inukas Awie tetep melai katatahie.[75]

⁷Tara TUHAN o hapus petak tuntang kare taloh awang huange, o kare naga tasik tuntang hapus tasik lombah;

⁸o kilat tuntang ujan es, salju tuntang baunandau, riwut barat je manumon parentah TUHAN!

⁹Tara akan Arae o kare lungkoh tuntang kare bukit gantong, batang bua tuntang kare kayu parak kayu;

¹⁰kakare meto balinek tuntang meto bariar, kakare meto manyarantar tuntang burong!

¹¹Tara akan Arae o kare raja tuntang kare bangsa, kare oloh utus gantong oloh ije mimbing kuasa;

¹²kakare oloh bawi hatue tabela, oloh bakas tuntang oloh tabela.

¹³Keleh ewen samandiai manara aran TUHAN awi aran Aie labih hai bara kakare aran; kahain Ayue te mahunjun langit tuntang petak.

¹⁴Ie jari mampaabas bangsae sampai Ie inara awi ungkupe, Israel, ungkup je eka sintan Aie. Tara TUHAN!