Read Ngaju MASMUR 17 Bible Online

MASMUR 17 - Ngaju bible

MASMUR 17

¹Lakudoan Dawid. Keleh mahining kariakku balaku kaadilan, keleh manantuani auh lakudoangku je bujur harus, o TUHAN.

²Keleh mambela pakarangku awi Ikau katawan narai taloh je bujur.

³Amon Ikau mariksa ateiku tuntang dumah manaliti aku hong hamalem, Ikau akan katawan je aku bujur harus; auhku tumon tirokku.

⁴Aku malalus taloh je irentah Awim tuntang dia mahoroi jalan kakaras.

⁵Aku harajur belom manumon atoh Ayum tuntang dia mahiwang bara jete.

⁶Aku mantehau Ikau, o Hatalla, awi Ikau tombah auhku; tampayah aku tuntang hining auhku.

⁷Parahan sintan Aim je bakahera-heran awi Ikau manyalamat oloh je bakalindong Dengam, intu balikatmu ewen aman bara sarangan musoh.

⁸Haga aku kilau bawak mata Aim, sahokan aku huang kalindong palapas Aim

⁹taharep oloh papa je manyarang aku. Aku ingapong musoh je handak mampatei aku;

¹⁰ewen dia kasene asi tuntang hakotak hapan kajohoe.

¹¹Ewen miar malawan aku tuntang mangarimpong aku. manggau katika uka mahampas aku.

¹²Ewen sama kilau singa je handak manangkarap taloh kinae, singa tabela je mimpa hong eka je basahokan.

¹³Keleh hingkat, o TUHAN keleh malawan musohku tuntang pakalah ewen. Keleh nyalamat aku hapan padang Aim bara oloh papa je manyarang aku.

¹⁴Keleh malapas aku bara oloh je manoyok ramon kalunen. Hukum ewen dengan calaka je inyadia Awim akan ewen. Nauhe anak eson ewen ihukum kea.

¹⁵Tapi aku kareh mite Ikau awi aku jaton bara kasalan. Katika aku misik, panumah Aim mawi ateiku hanjak.