Read Ngaju MASMUR 18 Bible Online

MASMUR 18 - Ngaju bible

MASMUR 18

¹Akan pamimpin koor. Masmur Dawid, rewar TUHAN. Inyanyi akan TUHAN katika Dawid ilapas bara Saul tuntang kare musohe.

²Aku sinta Ikau, o TUHAN, Ikau bewei kaabasku.

³TUHAN kilau kota je dehen ekaku bakalindong. Hatallangku kilau bukit batu eka ku bakanjungen Kilau talawang Ie manutup aku. tuntang manjaga aku mangat sanang harajur.

⁴Aku mantehau TUHAN je patut inara, ie mambebas aku bara kare musohku.

⁵Aku ingaliling bahaya pampatei, tuntang impaleteng sohon kabinasa.

⁶Aku inggaliling bahaya pampatei, jarat pampatei aton intu taharepku.

⁷Hong kajake aku mantehau TUHAN, aku mangkariak akan Hatallangku balaku dohop. Bara Human Ayue Ie mahining auhku tuntang manyeneh kariakku.

⁸Palus petak hongge tuntang hagenjeh kare galang bukit gohai tuntang hagenjeh awi kasangit Hatalla.

⁹Asep manampurus bara rumbak urong Ayue, apui tuntang barah balua bara nyaman Aie.

¹⁰Langit inyila Awie, palus ie mohon dengan baunandau kaput penda pain Aie.

¹¹Ie tarawang manongkang kerub; [10] Ie manari-nari hunjun riwut.

¹²Ie manyandurong arepe hapan kakaput, baunandau kawus je bakapal mangaliling Ie.

¹³Bara kilat intu Baue, balua baunandau, ujan es tuntang apui.

¹⁴Palus TUHAN mangaruntong bara langit; Je Pangkahai mampalua Auh Ayue.[11]

¹⁵Ie malekas kare panah Ayue tuntang mamisah darai musoh; Ie mawi kilat manyambar sir-sar, tuntang mawi ewen hadari.

¹⁶Laseh tasik babala tuntang galang petak habangah katika TUHAN manggatap musoh Aie hayak sangit.

¹⁷Bara hunjun TUHAN muloh lengen Aie; Ie mimbing tuntang manjijit aku bara huang danum je handalem.

¹⁸Ie manyalamat aku bara musoh je gagah tuntang bara kare oloh je basingi aku, awi ewen pahalau abas akangku.

¹⁹Ewen manyarang aku katika aku buah calaka, tapi TUHAN jadi pandohopku.

²⁰Ie malapas aku bara bahaya tuntang manyalamat aku awi Ie mangilak aku.

²¹TUHAN mambaleh gawingku je bujur; Ie mamberkat aku awi aku jaton bara kasalan.

²²Aku manumon parentah TUHAN tuntang dia manalikut Hatallangku.

²³Uras hukum Ayue inantuaniku, kare parentah Ayue dia ilihiku.

²⁴Ie katawan je aku jaton bara kasalan tuntang mangejau arep bara kasalan.

²⁵Palus TUHAN mambaleh gawingku je bujur awi Ie katawan aku jaton bara kasalan.

²⁶TUHAN Ikau baketep dengan oloh je baketep tuntang bahalap dengan oloh je bahalap.

²⁷Akan oloh je barasih Ikau mamparahan bitin Aim barasih, tapi oloh papa imusoh Aim.

²⁸Oloh je randah atei inyalamat Aim, tapi oloh je bajoho imparandahm.

²⁹Ikau manotong sumboku; TUHAN, Hatallangku mampalawaka kaputku.

³⁰Ikau mampaabas aku akan mampalomos musoh; dengan pandohop Hatallangku inelakku eka ewen bakalindong.

³¹Gawin Hatalla tinduh janjin TUHAN tau imercaya. Ie kilau talawang akan kakare oloh je bakalindong Dengae.

³²Awi baya TUHAN te Hatalla; Hatalla bewei pambela itah.

³³Ie Hatalla je mampaabas aku tuntang mawi jalangku aman.

³⁴ Ie mampaabas paingku kilau pain bajang, tuntang manjaga salamatku intu eka kare bukit.

³⁵Ie malatih aku akan baparang, sampai aku tau mangancang panah je pangkatekange.

³⁶TUHAN, Ikau mangalindong tuntang manyalamat aku, tuntang manyukah aku hapan kuasa Ayum; aku manang awi gawim.

³⁷Injagam aku uka aku dia tatawan, tuntang aku dia puji balongkang.

³⁸Inggoangku musohku tuntangimpakalahku ewen, tuntang dia undur sampai ewen binasa.

³⁹Ihampasku ewen sampai dia tau hingkat tinai, ewen halelek intu totok paingku.

⁴⁰Inenga Awim akangku kaabas akan baparang, tuntang kamanang bara kare musohku.

⁴¹Iawim musohku hadari bara aku; kare oloh je basingi aku imbinasaku.

⁴²Ewen mangkariak tapi jaton je mandohop, ewen mantehau TUHAN tapi jaton je tombah.

⁴³Ewen imparotekku kilau kawo je bahambur. tuntang ihunjengku kilau petak kisak hong jalan.

⁴⁴Ikau mambebas aku kilau bangsa je darhaka, tuntang mawi aku panguasa kare bangsa; bangsa je dia kasenangku jadi rewarku.

⁴⁵Kare oloh asing mamenda aku tuntang manumon amon mahining parentahku.

⁴⁶Kahanyin ewen jari nihau; ewen hagenjeh tuntang balua bara sarangae.

⁴⁷TUHAN belom! Tara akan pambelaku! Keleh Kahaim impahai Hatalla panyalamatku!

⁴⁸Ie manenga akangku kamanang bara musohku kare bangsa impakalah intu taharepku

⁴⁹aku inyalamat Awie bara kare musohku. TUHAN, inenga Awim akangku kamanang bara musohku, ingalindong Awim aku bara kare oloh je tulas.

⁵⁰ Awi te impahaiku aran Ayum marak kare bangsa, tuntang inyanyiku kare tara akan Ayum.

⁵¹Hatalla manenga kamanang hai akan raja Ayue, Ie tetep sinta oloh paintih Aie, iete Dawid tuntang turonae sampai katatahie.