Read Ngaju MASMUR 22 Bible Online

MASMUR 22 - Ngaju bible

MASMUR 22

¹Akan pamimpin koor. Manumon lagu: Bajang metoh matanandau lembut. Masmur Dawid.

² Hatallangku, o Hatallangku, mbuhen Ikau malihi aku? Aku mantehau tapi Ikau tetep kejau tuntang dia mandohop aku.

³O Hatallangku, aku mantehau hong katika handau, tapi Ikau tetep suni. Aku balakudoa hamalem, ateiku dia kea sanai.

⁴Tapi Ikau raja je barasih, je inara Israel.

⁵Tato hiang ikei harap Dengam, ewen harap, tuntang Ikau manyalamat ewen.

⁶Ewen mantehau Ikau tuntang iliwus; ewen harap tuntang dia imunga.

⁷Tapi aku toh handalai, dia olon, ihababaka tuntang inawah oloh are.

⁸ Uras je mite aku, halalea aku, ingingie tuntang inggilinge takoloke.

⁹ Koan ewen, “Nauhe ie harap TUHAN, mangat TUHAN manyalamat ie, amon TUHAN mangilak ie!”

¹⁰Ikau wei je mampalua aku bara kanain induku, tuntang mawi aku sanang hong pangkuan induku.

¹¹Bara inakan, pambelomku aton intu lengen Aim, bara hong kanain induku, Ikau Hatallangku.

¹²Ela ah kejau, awi bahaya jari tokep, tuntang jaton aton je mandohop.

¹³Kilau kawan banting, musoh mangarimpong aku, kilau banting bariar bara Basan ewen mangapong aku.

¹⁴Ewen manaharep aku dengan nyamae hanganga kilau singa je mangaruntong tuntang manangkarap.

¹⁵Kaabasku lepah kilau danum je batusoh, uras tulangku balekak bara sapae, ateiku mahasor kilau lilin.

¹⁶Balengkongku[13] keang kilau baras, jelangku leket intu tangepku. TUHAN, Ikau malihi aku intu hunjun baras kilau oloh je jari matei.

¹⁷Aku ingapong garombolan oloh papa; kilau kawan aso ewen mangarumbun aku, manyucok[14] lenge tuntang paingku.

¹⁸Uras tulangku tau aku misee, musoh manampayah aku kilau tontonan.

¹⁹ Ewen mambagi-bagi pakaianku, tuntang batenung tagal jubahku.

²⁰Tapi Ikau, ela ah kejau, o TUHAN dumah gulong mandohop aku, awi Ikau wei kaabasku.

²¹Keleh maliwus hambaruangku bara padang, keleh manyalamat aku bara tangkarap aso.

²²Aku jaton kaabasku,[15] keleh lapas aku bara tanduk banting tuntang bara nyaman singa.

²³ Gawim kareh inyaritaku akan kare paharingku; hong pumpong ungkup Ayum aku manara Ikau.

²⁴Tara Akae, o kare oloh panumon! Pahai Ie, kakare turonan Yakob! Sembah Ie, uras turonan Israel!

²⁵Awi Ie dia mitong randah oloh je tatindas, tuntang dia manawah kasusahe. Ie dia mules arepe bara oloh te, tapi mahining amon ie balaku dohop Dengae.

²⁶Hong bentok pumpong ungkup aku manara aran Ayum, awi uras taloh je iawim. Intu taharep ungkup je panumon iluputku parapah je jari injanjiku.

²⁷Oloh je belom susah kareh kuman sampai besoh; oloh je manalih TUHAN kareh manara Arae. Keleh keton sanang sampai katatahie!

²⁸Uras bangsa kareh mingat TUHAN tuntang haluli talih Ie, uras suku bangsa kareh sontop manyembah Ie.

²⁹Awi TUHAN wei je kuasa, Ie marentah kare bangsa.

³⁰Uras oloh hai kareh sontop intu taharep Aie,[16] uras olon dia bunggut kareh sontop manyembah Ie.

³¹Kare angkatan je rahian kareh manempo TUHAN Ie kareh imbrita girir manggirir.

³²Akan bangsa je inakan rahian kareh imbarita je TUHAN jari manyalamat ungkup Ayue.