Read Ngaju MASMUR 25 Bible Online

MASMUR 25 - Ngaju bible

MASMUR 25

¹Masmur Dawid. Akam, o TUHAN, aku manyampai lakudoangku,

²o Hatallangku, aku percaya Dengam! Ela manalua aku impahawen, tuntang inyorak awi kare musohku.

³Oloh je mambarontak malawan Ikau kareh impahawen, tapi oloh je percaya Dengam kareh dia mahamen.

⁴Parahan kahandak Aim akangku, o TUHAN, sanan en je musti ilalusku.

⁵Ajar tuntang ngagalan aku uka belom manumon kahandak Aim, awi Ikau Hatalla je manyalamat aku, aku harajur harap Dengam.

⁶Ingat Kataum tuntang sintan Aim, o TUHAN, je imparahan Awim bara solake.

⁷Ampun dosa tuntang kasalan wayah katabelangku, ingat aku tumon sintan Aim tuntang Kataum.

⁸Awi TUHAN te bahalap tuntang adil, Ie mamparahan jalan akan oloh je layau.

⁹TUHAN ngagalan oloh je randah atei, tuntang majar ewen tahiu kahandak Aie.

¹⁰Oloh je manumon janjii tuntang hukum Aie, inganggulo Awie dengan sinta tuntang kaketep.

¹¹TUHAN, ampun aku tumon janjin Aim, awi hai kasalangku.

¹²TUHAN majar oloh panumon tahiu jalan je musti ihoroi ewen.

¹³Ewen kareh tetep belom hakutoh, anak eson ewen kareh mawaris tanah pusaka,

¹⁴TUHAN te sobat oloh panumon, Ie mansanan maksud Aie akan ewen.

¹⁵Matangku tetep manintu TUHAN, awi Ie manyalamat aku bara bahaya.

¹⁶Tampayah aku, tuntang pasi aku, awi aku ungi-ungin tuntang pehe.

¹⁷Kasusah ateiku sasar mandahang lapas aku bara kajakengku.

¹⁸Nantuani kasusah tuntang kapehengku, tuntang ampun kakare dosangku.

¹⁹Item lalehan kare musohku; ewen paham manyingi aku.

²⁰Keleh manjaga tuntang manyalamat aku, mangat aku dia buah kahawen, awi aku bakalindong Dengam.

²¹Keleh kahalap tuntang kabujur mandengan aku, awi aku harap Dengam.

²²O Hatalla, paliwus ungkup Aim bara kakare kapehee.