Read Ngaju MASMUR 31 Bible Online

MASMUR 31 - Ngaju bible

MASMUR 31

¹Akan pamimpin koor. Masmur Dawid.

²Ikau eka kalindongku o TUHAN, ela manalua aku impahawen. Keleh manyalamat aku tagal kaadil Ayum

³keleh hining auhku tuntang paliwus aku gulong. Keleh Ikau jadi sama kilau bukit batu ekaku bakalindong sama kilau kota je dehen ekaku inyalamat.

⁴Yoh, Ikau kilau bukit batu tuntang kota je dehen akangku! Keleh ngagalan aku tumon janjin Aim.

⁵Keleh maliwus aku bara jarat je inenan mawi aku, awi Ikau ekaku bakalindong.

⁶ Akan huang lengen Aim aku manyarah bitingku; Ikau mambebas aku, o TUHAN, Hatallangku je baketep.

⁷Oloh je manyembah hampatong dewa inyingi Awim; tapi aku percaya dengan TUHAN.

⁸Aku kareh hanjak rantang awi Ikau tetep sinta aku. Ikau mite kapehengku tuntang nantuani kasusahku.

⁹Ikau dia manalua aku inawan musoh, tapi manenga kabebas akangku mananjong.

¹⁰Pasi aku, o TUHAN awi aku huang kasusah; matangku bakarah awi manangis, aku paham asi-asi.

¹¹Pambelomku lepah huang kajake, kare nyelongku mahalau huang tarahing. Kaabasku rusut awi kapapangku, kare tulangku mahin jari karetap.

¹²Aku inantawe awi kakare musohku, awi kare oloh sansila humangku Uras kapatohku tarewen amon mite aku, ewen babuhau amon hasondau dengangku hong jalan.

¹³Aku ingalapean kilau oloh matei, tuntang jadi kilau ramo je inganan.

¹⁴Intu hete-hete aton taloh je mampikeh; Aku mahining auh kare musohku Ewen pakat malawan aku, tuntang mawi rencana akan mampatei aku.

¹⁵Tapi aku harap Dengam, o TUHAN, awi Ikau wei Hatallangku.

¹⁶Ikau harajur mahaga aku; keleh nyalamat aku bara kare musohku, tuntang bara kare oloh je manggoang aku.

¹⁷Keleh Ikau mangilak aku; keleh manyalamat aku awi sintan Aim.

¹⁸Ela manalua aku impahawen, o TUHAN, awi aku mantehau Ikau. Nauh oloh papa impahawen, tuntang benye-benyem mohon akan lewun oloh matei.

¹⁹Keleh manyumbel nyaman kare oloh pananjaro je dengan kajohoe hababaka oloh je bujur ateie.

²⁰Lalehan kakutoh kare kahalap Aim je inyadia Awim akan oloh je panumon! Genep bitin oloh mite Kataum je Iawim, akan ewen je bakalindong intu Ikau.

²¹Ikau manyahokan ewen huang bitim taharep siasat oloh papa; Ikau mahaga tuntang mangalindong ewen taharep auh dawa ain musoh.

²²Tara TUHAN! Aku paham hengan dengan sintan Aie, katika aku ingapong tuntang inyarang.

²³Huang kabingung aku madoe TUHAN jari manganan aku bara taharep Baue. Tapi Ie tau mahining palakungku katika aku mantehau Ie.

²⁴Keleh sinta dengan TUHAN, o hapus ungkup Ayue, TUHAN mangalindong oloh je baketep. Tapi oloh je bajoho ihukum Awie bahimat.

²⁵Keleh mampaabas tuntang mandehen ateim, kakare keton je harap dengan TUHAN!