Read Ngaju MASMUR 32 Bible Online

MASMUR 32 - Ngaju bible

MASMUR 32

¹ Masmur Dawid. Nyanyi hapa majar. Salamat oloh je dosae iampun tuntang kasalae ingalapean.

²Salamat oloh je kapapae dia itong awi TUHAN, tuntang je dia rajin manipu.

³Katahin aku dia mangaku dosangku, aku susah awi manarahing hapus andau.

⁴Handau hamalem Ikau mahenyek aku, TUHAN, kaabasku lepah kilau inyup kalasot matanandau.

⁵ Palus aku mangaku dosangku Akam, Kasalangku jaton je inyahokangku. Aku manukas akan mangaku te Akam, tuntang Ikau mampun kakare dosangku.

⁶Awi te genep oloh barasih keleh balakudoa katika buah kajake, sampai amon soho kasusah dumah, ie dia buah.

⁷Ikau ekaku basahokan, Ikau maliwus aku bara kasusah. Palus aku basasurak hanjak, awi Ikau jari manyalamat aku.

⁸Koan TUHAN, “Aku kareh mamparahan jalan je musti ihoroim, Ikau kareh ingagalang-Ku tuntang inasehat-Ku.

⁹Ela kilau kuda je jaton akal, je musti ingamburi hapan gandali tuntang tali intu nyamae uka manumon.”

¹⁰Oloh badosa inaripi are kapehe; tapi oloh je harap dengan TUHAN tetep ingalindong awi sinta Ayue.

¹¹O kare oloh barasih, keleh hanjak rantang, tagal taloh je jari ilalus TUHAN. Basasurak hanjak, o kare oloh je bujur atei!