Read Ngaju MASMUR 33 Bible Online

MASMUR 33 - Ngaju bible

MASMUR 33

¹O oloh barasih, keleh basasurak hanjak awi taloh je jari ilalus TUHAN; patut wei oloh bujur ateie manara.

²Keleh manarimakasih akan TUHAN dengan kacapi, keleh manyanyi Akae impahayak hapan musik.

³Keleh manyanyi nyanyi taheta akan TUHAN, keleh mampahiau kecapi bahala-halap tuntang basasurak hanjak!

⁴Uras auh TUHAN tau imercaya; Ie baketep hong kakare taloh Gawie.

⁵Ie sinta atei je bujur tuntang adil; hapus petak kontep dengan sinta Ayue.

⁶TUHAN manenga parentah, maka langit injapa; matanandau, bulan tuntang bintang inampa awi Auhe.

⁷Salepah danum tasik imumponge hong ije eka, tasik lombah ingampeng Awie huang tabat batu.

⁸Keleh hapus kalunen mikeh dengan TUHAN tuntang ungkup oloh kalunen mahormat Ie.

⁹Awi Ie hamauh, palus taloh handiai injadian; Ie manenga parentah, balalu taloh handiai aton.

¹⁰TUHAN mambalang rencana kare bangsa, Ie manganan kahandak ewen.

¹¹Tapi rencana TUHAN tetep ilalus, tirok Ayue dehen katatahie.

¹²Salamat bangsa je mangaku TUHAN kilau Hatalla, salamat ungkup je intih Awie jadi oloh Ayue!

¹³Bara sorga TUHAN manangkilik kapenda, tuntang Ie mite hapus kalunen.

¹⁴Bara padadusan Ayue TUHAN manantuneng kakare taloh je melai hunjun petak.

¹⁵Ie je mangupeh atei ewen, tuntang katawan kare gawin ewen.

¹⁶Raja dia manang awi kahain tantara, tantara dia salamat awi kaabase.

¹⁷Kuda dia tau iandal akan manang, kaabase je hai dia tau manyalamat.

¹⁸TUHAN manjaga kare oloh panumon je maharap sinta Ayue.

¹⁹Ie manyalamat ewen bara pampatei, tuntang mambelom ewen hong wayah lau.

²⁰Maka itah bara kaharap dengan TUHAN, ie pandohop tuntang pambela itah.

²¹Itah hanjak rantang tagal Ie tuntang percaya dengan aran Ayue je barasih.

²²Keleh ikei tetep inyinta Awim, o TUHAN, awi ikei harap Dengam.