Read Ngaju MASMUR 34 Bible Online

MASMUR 34 - Ngaju bible

MASMUR 34

¹ Masmur Dawid, katika ie pura-pura nyanyau intu taharep Abimelekh, sampai ie iharak haguet.

²Aku handak manarima kasih genep katika, tuntang dia tera-terai manara Arae.

³Aku handak tara-tara tagal gawim TUHAN, keleh oloh tatindas mahining Auhe tuntang hanjak.

⁴Keleh mampahai aran TUHAN hayak dengangku, has haya-hayak mampahai aran Ayue.

⁵Aku balakudoa intu TUHAN, tuntang Ie tombah, tuntang maliwus aku bara kare kikeh.

⁶Oloh tatindas harap Dengae tuntang hanjak, ewen jaton bara buku akan mahamen.

⁷Oloh je asi-asi mantehau tuntang TUHAN tombah auhe, maliwus ie bara kare kajakee.

⁸Malaikat TUHAN manjaga oloh je panumon, tuntang maliwus ewen bara bahaya.

⁹ Keleh mangkeme kabuat kapaham kahalap TUHAN, selamat oloh je bakalindong Dengae.

¹⁰Keleh mahormat TUHAN o keton ungkup Ayue, awi oloh panumon dia kareh bara katapas.

¹¹Kare singa kea balau awi tapas panginan; tapi oloh je manyembah TUHAN jaton bara katapas.

¹²Keleh hining o anak oloh samandiai, aku majar keton mahormat TUHAN.

¹³ En keton handak panjang umur tuntang mangkeme taloh je bahalap?

¹⁴Ela mampalua kare auh je papa, tuntang ela auh tanjaro.

¹⁵Keleh mahakan bara taloh je papa, tapi lalus taloh je bahalap, keleh manggau kadamai dengan salepah kaabas.

¹⁶TUHAN manantuani oloh barasih, Ie mahining amon ewen nangkariak balaku dohop.

¹⁷Tapi Ie malawan oloh je mawi kapapa; amon ewen matei, ewen gulong ingalapean.

¹⁸Amon oloh barasih mantehau, TUHAN mahining, tuntang manyalamat ewen bara kare kajake.

¹⁹TUHAN tokep dengan oloh je korik ateie; Ie manyalamat oloh je balemo atei huange.

²⁰Are wei kapehen oloh je bahalap, tapi TUHAN mambebas ie bara taloh samandiai te.

²¹ Bitie tetep injaga TUHAN, tulang bitie ije mahin jaton je imelek.

²²Oloh papa kareh matei awi kapapae, oloh je basingi dengan oloh barasih kareh ihukum.

²³TUHAN manyalamat kere reware; je bakalindong intu Ie dia kareh ihukum.