Read Ngaju MASMUR 35 Bible Online

MASMUR 35 - Ngaju bible

MASMUR 35

¹Masmur Dawid. TUHAN, keleh malawan oloh je malawan aku, keleh mamarang oloh je mamarang aku.

²Duan taming tuntang talawang Aim, tuntang harikas mandohop aku.

³Juju sarapang tuntang lunju Aim akan malawan oloh je manggoang aku suman akangku je Ikau panyalamat aingku.

⁴Keleh oloh je handak mampatei aku impakalah tuntang impahawen. Keleh oloh je pakat malawan aku undur awi inderoh tiroke.

⁵Keleh ewen inggoang awi malekat TUHAN, sama kilau bulu je inantawus riwut.

⁶Keleh ewen inggoang awi malekat TUHAN, intu jalan je kaput tuntang malisen.

⁷Jaton gunae ewen manenan jarat akangku atawa mangali petak hapa manawan aku.

⁸Keleh ewen intakan kabinasa nantekas. Nauhe ewen buah singkap hong jarat ayue kabuat palus manjato tuntang binasa.

⁹Aku basura-surak tagal TUHAN, ateiku hanjak awi Ie manyalamat aku.

¹⁰Dengan salepah atei aku hamauh, “TUHAN, Ikau jaton aton tandinge! Ikau malapas je balemo bara je abas, je belom susah tuntang kapehe bara panindase.”

¹¹Kare saksi papa harikas malawan aku, tuntang mandawa aku mawi kare taloh je dia aku katawae.

¹²Kahalapku imbaleh ewen dengan kapapa; aku tangkelem huang kagalabah.

¹³katika ewen haban, aku pehe atei tuntang dia kuman; aku balakudoa hayak manyontop takolokku.

¹⁴Sama kilau balakudoa akan pahari atawa kawal je heret. Aku sontop manangis akan ewen kilau manatum akan induku kabuat.

¹⁵Tapi katika aku susah ewen sanang, tuntang hakarimpong malawan aku. Ewen mananjong mampatimpang arepe mahalalea aku.

¹⁶Ewen tarus hababaka oloh lumpuh, tuntang mananture dengan kasingi.

¹⁷Sampai hamparea, o TUHAN, sampai hamparea Ikau baya nampayah bewei? Nyalamat aku bara sarangan ewen, keleh malapas hambaruangku bara kare singa te.

¹⁸Palus aku kareh manarimakasih intu Ikau hong bentok ungkup Aim, tuntang manara Aram huang pumpong ewen.

¹⁹ Ela manalua aku iusik awi oloh je mamusoh aku jaton bukue. Ela manalua aku inyorak awi oloh je basingi aku jaton bara sabab.

²⁰Kotak ewen dia bajenta; ewen marencana gawin tipu mawi oloh je belom rukun.

²¹Ewen mangkariak dengangku tuntang hamauh, je ewen kareh mite gawingku.

²²Tapi Ikau TUHAN, jari mitee; ela mambanyem arep, o TUHAN, ela kejau bara aku.

²³Harikas mambela pakarangku, o Hatallangku tuntang TUHAN aingku, dohop aku!

²⁴Keleh mambela aku, awi Ikau adil, o TUHAN, Hatallangku, ela manalua musoh manyurak aku.

²⁵Ela manalua ewen hamauh hong ateie, “Itah jari manjawut hambaruae, kanahuang itah sampai!”

²⁶Nauhe oloh je sanang mite kapehengku manjadi bingung tuntang impahawen. Nauhe oloh je bajoho taharep aku inawah tuntang impahawen.

²⁷Keleh oloh je handak mite aku bujur basurak tuntang hanjak. Keleh ewen lula-luli hamauh, “Toto TUHAN te hai! Ie mangahandak salamat akan rewar Ayue!”

²⁸Palus aku kareh mambarita kaadil Ayum, tuntang manara Aram hapus andau.