Read Ngaju MASMUR 36 Bible Online

MASMUR 36 - Ngaju bible

MASMUR 36

¹Akan pamimpin koor. Bara Dawid rewar TUHAN.

² Dosa hakotak huang kandalem atei oloh papa, ie samasinde dia mikeh dengan Hatalla.

³Ie mitong arepe paham tamam, sampai dia katawan kasalae, tuntang dia manyingi jete.

⁴Kare auhe papa tuntang kontep tipu, ie dia hindai malalus taloh je bahalap tuntang pintar harati.

⁵Intu sasuro ie manirok kapapa; gawie jaton je bahalap, je papa dia inolake.

⁶TUHAN, sintan Aim sama kilau langit kamboe, tuntang kaketep Aim sampai akan baunandau.

⁷Kahalap Ayum panju-panjung sama kilau bukit kamboe, tuntang kaadilmu sama kilau tasik kandaleme; olon tuntang meto ihaga Awim, o TUHAN.

⁸Paham barega sintan Ayum, o Hatalla, olon bakalindong huang kanjungen palapas Aim.

⁹Ewen besoh dengan panginan je malabien karee intu Humam, dengan taloh ihop bara sungei Aim je mamparigas.

¹⁰Ikau tahasak pambelom uras kare taloh belom, intu kalawam ikei mite kalawa.

¹¹Keleh Ikau tetep sinta oloh je kasene Ikau, tuntang malalus kahalap dengan oloh je bujur.

¹²Ela manalua aku inyarang oloh bajoho, atawa iharak awi oloh papa.

¹³Item, oloh je mawi kapapa jari balongkang, ewen halelek dia tau mendeng tinai.