Read Ngaju MASMUR 38 Bible Online

MASMUR 38 - Ngaju bible

MASMUR 38

¹Masmur Dawid katika maluput parapah pampingat.

²TUHAN, ela mahukum aku Awim sangit, ela manyiksa aku Awim balait.

³Panah Ayum tame mampahimang bitingku, lengen Aim babehat angate mawi aku.

⁴Aku haban paham awi Ikau sangit; jaton je barigas intu bitingku awi dosangku.

⁵Aku leteng hong soho kasalangku, tanggongan dosangku lalau babehat akangku.

⁶Kare himangku hanana tuntang ewau maram, awi aku jari malalus kahumong.

⁷Aku tajongkang tuntang hajongkong, hapus andau aku manyuni tuntang pehe atei.

⁸Darem mamapui bitingku, jaton je mangat hong bitingku.

⁹Aku heka toto tuntang lepah kaabas, aku manarahing awi ateiku balisah.

¹⁰TUHAN, Ikau katawan kare kanahuangku, kakotokku dia basilin akam.

¹¹Jantongku mega-megap kaabasku lilap, matangku jari kawus.

¹²Kare kapatohku mahakan awi panyakitku, tundah kolangku haream mangejau arepe.

¹³Oloh je handak mampatei aku manenan jabak mawi aku; je handak mancalaka aku maaneam handak mampalomos aku.

¹⁴Tapi aku kilau oloh badengen je dia mahining, kilau oloh bisu je dia tau hakotak.

¹⁵Toto, aku kilau oloh je dia mahining, tuntang awi te dia mambantah.

¹⁶Tapi aku harap Dengam, o TUHAN, tuntang Ikau, TUHAN, Hatallangku, tombah auhku.

¹⁷Ela manalua musohku sanang mite kasusahku, ela manalua ewen mangamburau amon aku bembang.

¹⁸Aku bilak balongkang, harajur kapehe.

¹⁹Aku mangaku kare dosangku; ateiku susah manirok kasusahku.

²⁰Kare oloh je hamusoh dengangku are tuntang abas, ewen sangit dengan cara pambelomku.

²¹Oloh je mamaleh kahalap dengan kapapa hamusoh dengangku awi aku malalus taloh je bahalap.

²²O TUHAN ela malihi aku, ela kejau bara aku, o Hatallangku.

²³Hetoh gulong mandohop aku, o TUHAN panyalamatku.