Read Ngaju MASMUR 40 Bible Online

MASMUR 40 - Ngaju bible

MASMUR 40

¹Akan pamimpin koor. Masmur Dawid.

²Dengan sabar aku mentai pandohop bara TUHAN; palus Ie mite aku tuntang mahining auhku.

³Ie manjijit aku bara rumbak je bahaya bara rumpur luau. Ie mandak aku intu hunjun bukit batu, sampai ingkang paingku segah.

⁴Ie majar aku manyanyi lagu taheta, lagu tara akan Hatallan itah. Are oloh mite tuntang mikeh, palus percaya dengan TUHAN.

⁵Salamat oloh je percaya dengan TUHAN, je dia omba manyembah kare dewa, atawa balaku dohop dengan oloh bajoho.

⁶TUHAN, lalehan kare gawim akan ikei, o TUHAN Hatallangku, Ikau jaton je padan Dengam! Are wei rencana Ayum je mampahengan akan ikei, dia olih inyarita urase.

⁷ Parapah tuntang parapah panginan dia ingilak Awim, parapah je ingehu tuntang parapah parasih dosa dia ilakum. Tapi Ikau jari manenga akangku pinding je tau mahining Auhm.

⁸Palus aku hamauh, “Toh aku hong balun surat je inyurat akangku:

⁹Aku sanang malalus kahandak Ayum, o Hatalla, hukum Ayum inaku hong ateiku.”

¹⁰Hong pumpong ungkup Aim imbaritaku barita kahanjak iete Ikau jari manyalamat ikei. Raju-rajur taloh te insanangku, Ikau katawan urase te o TUHAN.

¹¹Barita salamat te dia ingkesku hong atei, pandohop tuntang kaketep Aim harajur imbritaku. Intu taharep pumpong ungkup Ayum aku dia manyuni, tapi insanangku sintan Aim tuntang kaketep Aim.

¹²TUHAN, ela tende masi aku; kalindong aku harajur dengan sintan Aim tuntang kaketep Aim.

¹³Aku ingapong calaka je are jumlahe dia olih iise. Aku inggoang awi dosangku sampai aku dia olih nampayah. Karee labih bara balau hong takolokku mawi aku bagalabah.

¹⁴O TUHAN, nyalamat aku, TUHAN jeleng dohop aku!

¹⁵Nauhe oloh je nahuang mampatei aku impakalah tuntang hadari bingung. Nauhe oloh je manyurak kasialku imukul mundur tuntang ihina.

¹⁶Nauhe oloh je nanatawe aku tarewen tuntang mahamen.

¹⁷Keleh uras kare oloh je manyembah Ikau hanjak rantang, tuntang uras oloh je sinta salamat bara Ikau harajur hamauh, “Toto hai TUHAN!”

¹⁸Aku toh je belom susah tuntang balemo, tapi TUHAN mite aku Ikau pandohop tuntang panyalamatku, ela randar o Hatallangku!