Read Ngaju MASMUR 42 Bible Online

MASMUR 42 - Ngaju bible

MASMUR 42

¹Akan pamimpin koor. Nyanyi auh ajar ain jalahan Korah.

²Kilau bajang taharu tahasak danum, tumon te hambaruangku taharu Dengam o Hatalla.

³Aku taharu dengan Hatalla je belom, hamparea aku tau haguet sombayang intu Human Aie?

⁴Handau hamalem aku manangis, baya danum mata panginangku. Hapus andau musohku misek, “Intu kueh Hatallam?”

⁵Ateiku pehe amon mingat katika horan, katika aku akan Human TUHAN hayak oloh are mahaga andau hai. Aku mananjong intu baun arakan dengan karamin surak tuntang lagu tara.

⁶Mbuhen ateiku susah tuntang balisah? Aku harap dengan Hatalla. Palus aku kareh manarimakasih hindai akan Ayue, akan Hatallangku tuntang panyalamatku.

⁷Intu lewu eka tawanan toh ateiku rotek ramok awi te aku mingat TUHAN. Hambaruangku bahantong intu dehes kasusah, buah sohon kagalabah; kilau gotok riam Sungei Yordan bara bukit Hermon tuntang bukit Misar.

⁹Keleh TUHAN mamparahan sintan Ayue katika handau, uka amon hamalem aku tau manyanyi, tuntang balakudoa akan Hatallan pambelomku.

¹⁰Aku hamauh dengan Hatalla pambelomku. “Mbuhen Ikau mangalapean aku? Mbuhen aku musti harajur kapehe, awi inindas kare musohku?”

¹¹Ateiku hancor awi auh hababakan musoh. Ewen harajur misek, “Intu kueh Hatallam?”

¹²Mbuhen ateiku susah tuntang balisah? Aku harap dengan Hatalla. Palus aku kareh manarimakasih tinai akae, akan Hatallangku tuntang panyalamatku.