Read Ngaju MASMUR 44 Bible Online

MASMUR 44 - Ngaju bible

MASMUR 44

¹Masmur jalahan Korah. Nyanyin auh ajar akan pamimpin koor.

²O Hatalla ikei jari mahining kabuat sarita je inyarita awi tato hiang ikei tahiu gawi hai je Iawim intu jaman horan.

³Ikau kabuat maharak kare bangsa uka ungkup Aim manetep intu lewun ewen. Kare bangsa beken incalaka Awim, tapi ungkup Aim inaluam sasar are.

⁴Lewu te dia irabut ewen dengan padang; dia dengan kaabas kabuat ewen manang tapi dengan kuasa tuntang kalawan panumah Aim, awi Ikau mangilak ungkup Aim.

⁵Ikau rajangku tuntang Hatallangku, je manenga kamanang akan ungkup Ayum.

⁶Dengan kuasan Aim ikei mampakalah musoh ikei, tuntang manguasa kare oloh je manyingi ikei.

⁷Awi aku dia maandal panahku, padangku mahin dia kareh manyalamat aku.

⁸Tapi Ikau je manyalamat ikei bara kare musoh, tuntang mampakalah kare oloh je basingi ikei.

⁹Palus ikei kareh harajur mampahai Aram tuntang harajur manarimakasih Akam.

¹⁰Tapi toh Ikau malihi ikei tuntang manalua ikei impakalah. Ikau dia hindai miar dengan barisan ikei.

¹¹Ikau manalua ikei hadari bara musoh ikei, tuntang ewen marampas ramon ikei.

¹²Ikau manalua ikei inyambalih kilau tabiri, tuntang imisah darai Awim ikei marak kare bangsa.

¹³Ikau manjual ungkup Ayum dengan rega murah, jaton ontonge.

¹⁴Ikau mawi ikei indu hababakan oloh sansila human ikei ewen mahalalea tuntang manatawe ikei,

¹⁵Ikau mawi ikei akan sindir kare bangsa; ewen manggiling takoloke sambil manawah ikei.

¹⁶Hapus andau aku imapa, aku paham impahawen,

¹⁷awi mahining auh halalea tuntang tawah bara nyaman musoh tuntang oloh je mingkes dandaman.

¹⁸Uras te jari buah ikei aloh aku dia mangalapean Ikau atawa khianat dengan janji Ayum akan ikei.

¹⁹Atei ikei dia mahiwang bara Ikau; parentah Ayum dia ikei manganae.

²⁰Tapi Ikau malihi ikei huang kakaput; ikei balemo marak meto basiak.

²¹Paribasa ikei dia hindai manyembah Hatalla, malengkan balakudoa akan hatalla beken,

²²Hatalla pasti kareh mangatawae, awi Ie mangasene taloh basilim huang atei ikei.

²³ Tagal Ikau ikei harajur buah ancaman pampatei, tuntang iawi kilau tabiri akan inyambalih.

²⁴Misik, o TUHAN! Mbuhen Ikau batiroh? Harikas! Ela manolak ikei sampai katatahie.

²⁵Mbuhen Ikau basahokan, tuntang mangalapean kapehe tuntang kasusah ikei?

²⁶Ikei manjato hancor intu petak, ikei halelek kalah intu kawo.

²⁷Keleh harikas tuntang dumah mandohop ikei, keleh nyalamat ikei tagal sintan Aim.