Read Ngaju MASMUR 45 Bible Online

MASMUR 45 - Ngaju bible

MASMUR 45

¹Masmur jalahan koorah. Nyanyin sinta. Akan pamimpin koor. Tumon kare lagu: Kambang Bakung.

²Auh bahalap mamujar bara ateiku, aku mambo nyanyingku akan raja. Kilau pen ije biti pujangga pintar, jelangku tatap mansanan sair.

³Ikau je paling bakena marak olon, auhm kontep kahalap, awi te ikau imberkat Hatalla katatahie.

⁴Tangking padangm intu kahang o raja menteng, ikau paham hai, rami tuntang bahalap!

⁵Keleh miar dengan gagah manintu kamanang manggoang katoto tuntang kaadil ije lowah; dengan kaabasm keleh marabut kamanang je hai!

⁶Panahm je batajim manembus jantung musohm kare bangsa balongkang intu totok paim.

⁷ Hatalla manenga akam kuasa marentah,[26] kuasam dehen palus katatahie; dengan adil ikau marentah rayatm.

⁸Ikau sinta katoto tuntang basingi kapapa; awi te Hatalla, Hatallam jari mintih ikau, tuntang mawi salamat akam labih bara kare raja beken.

⁹Pakaiam ewau mur, garo tuntang candana; pamain musik intu istana gading mawi ikau hanjak.

¹⁰Marak kare dayang istana aton kare putri raja. Intu gantaun padadusam mendeng permaisuri dengan hiasan amas murni.

¹¹O Putri, hining kare auhku ngalapean kare bangsa tuntang kolam.

¹²Kabungasm mampahanjak atei raja, ie tuan ayum, keleh mamenda ie.

¹³Oloh Tirus mimbit panenga akam; oloh tatau mangantau ikau.

¹⁴Putri raja tame dengan kontep kahalap; pakaiae basulam amas.

¹⁵Dengan pakaian warna-warni ie imbit talih raja, inuntut kare bawi, kawal ayue, ewen kea imbit akan raja.

¹⁶Ewen basasurak hanjak katika iagah tame istana raja!

¹⁷Ikau, rajangku, kareh dinon are anak hatue akan mondok padadusan tato hiangm. Ewen kareh iawim panguasa hapus kalunen.

¹⁸Dengan lagu toh imbaritaku ikau girir-manggirir; kare bangsa kareh manara ikau palus katatahie.