Read Ngaju MASMUR 49 Bible Online

MASMUR 49 - Ngaju bible

MASMUR 49

¹Masmur jalahan Korah. Akan pamimpin koor.

²Hining, o kakare bangsa, seneh, o ungkup oloh kalunen,

³aloh oloh je naniha, atawa oloh hai aloh oloh je belom susah, atawa oloh tatau.

⁴Aku kareh mansanan auh kapintar kaharati, auh tirokku paham handalem.

⁵Aku kareh manantuani paribasa, tuntang manarang rimae sambil mampahiau kacapi.

⁶Aku dia mikeh hong wayah kajake, katika aku ingapong awi musoh je papa.

⁷Ewen te maandal panataue, tuntang tara-tara dengan ramoe.

⁸Puna jaton oloh je tau manyalamat paharie, atawa mambayar duit tewus akan Hatalla.

⁹Narai kea je inengaa dia tau sukup; pahalau larang regan tewus hambaruae,

¹⁰mangat ie liwus bara pampatei tuntang tau belom palus katatahie.

¹¹Dia, ie kareh mite je oloh pintar harati kea matei. Oloh bureng tuntang humong kareh sama-sama binasa, tuntang malihi panataue akan oloh beken.

¹²Ewen kareh melai intu kubur katatahie; jete eka melai ewen palus dapit, aloh bihin ewen tempon are petak.

¹³Olon dia tau belom katatahie huang panatau; sama kilau meto ie kea kareh binasa.

¹⁴Kalote kajarian oloh je maandal arepe, tuntang kajarian oloh je puas dengan auhe.

¹⁵Kilau tabiri ewen inukas uka matei; pampatei kareh jadi sakatik ewen. Hanjewu ewen impakalah awi oloh bujur atei. bitin ewen gulong maram intu lewun oloh matei. kejau bara eka melai je hapanatau.

¹⁶Tapi Hatalla kareh mambebas aku, Ie kareh malapas aku bara kuasan pampatei.

¹⁷Ela mikeh amon oloh manjadi tatau tuntang panataue sasar are.

¹⁸Awi katika matei ie dia tau mimbit taloh en-en, panataue dia akan mohon akan kubur hayak ie.

¹⁹Tinai amon ije biti oloh batuah hong pambelome tuntang ihormat-inara awi kare hasil gawie,

²⁰ie kareh manuntut tato hiange kea akan eka je kaput palus katatahie.

²¹Olon dia tau belom katatahie hong kapanatau, kilau meto ie kea kareh binasa.