Read Ngaju MASMUR 5 Bible Online

MASMUR 5 - Ngaju bible

MASMUR 5

¹Akan pemimpin koor. Dengan musik suling. Masmur Dawid.

²O TUHAN, hining kare auhku, seneh auh kakotokku.

³Tarima palakungku tuntang dohop aku, o Rajangku tuntang Hatallangku.

⁴Awi intu Ikau aku balakudoa, o TUHAN, keleh hining auh tehauku hanjewu. Hanjewu imbitku parapahku[4] tuntang ientaiku panombah Aim, o TUHAN.

⁵Ikau Hatalla je dia mangilak kapapa; oloh papa dia tau maja Ikau.

⁶Ikau dia tahan mite oloh balecak, Ikau basingi oloh je mawi kapapa.

⁷Ikau mambinasa oloh je rajin mananjaro, Ikau manawah oloh panipu tuntang pamuno.

⁸Tapi awi sintan Aim je hai, aku tau tame akan huang Huma Aim. Aku sontop manintu Huma Aim je barasih, tuntang inyembahku Ikau salepah atei.

⁹O TUHAN, paham are musohku! Keleh ngagalan aku akan malalus kahandak Aim, tuntang parahan jalan Ayum je musti ihoroiku.

¹⁰ Awi auh musohku dia tau imercaya; atei ewen kontep rencana papa. Kare auh ewen manis mampahanjak, tapi atei-huang ewen kontep kapapa.

¹¹Hukum ewen, o Hatalla, nauhe ewen calaka awi rencanae kabuat. Harak ewen awi dosan ewen, awi ewen jari mandarhaka malawan Ikau.

¹²Keleh uras oloh je bakalindong Dengam hanjak tuntang basasurak katatahie. Keleh kalindong kare oloh je sinta Ikau, mangat ewen hanjak tagal Ikau.

¹³Awi Ikau mamberkat oloh je baketep Dengam, Ikau mangalindong ewen dengan sintan Aim.