Read Ngaju MASMUR 50 Bible Online

MASMUR 50 - Ngaju bible

MASMUR 50

¹Masmur Asap. TUHAN, Hatalla Je Jaton Tikas Kuasa hamauh, Ie mantehau akan hapus petak bara timor sampai akan barat.

²Bara Sion, lewu hakota je pangkahalape, Hatalla dumah dengan kalawa.

³Hatallan itah dumah tuntang dia melai manyuni, helo bara baue aton apui hagandang, tuntang ingaliling riwut barat je hai.

⁴Ie matehau langit tuntang petak uka manyaksi Ie mahakim ungkup Ayue.

⁵Koae, “Keleh mamumpong hapus ungkup-Ku je jari mampendeng janji dengang-Ku, tuntang mandehen jete hapan parapah je inyambalih.”

⁶Langit mambarita je Hatalla mahakim ungkup Ayue, tuntang Ie kabuat jadi Hakime.

⁷“Hining ungkup-Ku, Aku handak hakotak, Israel, aku handak manyaksi intu taharepm; Aku toh Hatalla, Hatallan ayum.

⁸Dia tagal parapahm Aku mandawa ikau; parapah je ingehum harajur aton intu taharep-Ku.

⁹Aku dia manggau sapi bara karambangm, atawa kambing bara kawan metom;

¹⁰awi uras meto intu parakayu te ayung-Ku, tuntang meto intu bakuya-kuyan bukit.

¹¹Uras burong intu kare bukit gantong ayung-Ku kea. tuntang uras taloh belom je belom intu parak kayu.

¹²Amon aku balau Aku dia perlu mansanan akam, awi kalunen dengan taloh huange jete ayung-Ku.

¹³Aku dia kuman isin sapi hatue, dia kea mihop dahan kambing hatue.

¹⁴Keleh maluput parapah tarimakasih akan Hatalla,[28] keleh manggenep kare janjin Aim dengan Je Pangkahai.

¹⁵Keleh mantehau Aku hong wayah kajake, Aku kareh maliwus keton, tuntang keton kareh manara Aku.”

¹⁶Tapi akan oloh papa TUHAN hamauh, “Ikau jaton hak mansanan hukum-Ku, tuntang hakotak tahiu janjing-Ku.

¹⁷Awi ikau dia nahuang manarima tingak-Ku, tuntang manolak kare parentah-Ku.

¹⁸Amon ikau mite ije biti maling ikau omba ie, tuntang ikau hinje dengan kare oloh je rajin habandong.

¹⁹Ikau harajur manahiu taloh je papa, tuntang harajur tatap dengan tipu-daya.

²⁰Ikau harajur mamapa paharim, tuntang mambitak paharim ije kalambutan.

²¹Jete je iawim, tapi Aku suni bewei, jadi ikau manirok Aku kilau ikau. Tapi toh Aku manyalan ikau, tuntang uras kare taloh te iawi-Ku babala akam.

²²Keleh tampayah, keton je kalapean dengan Hatalla; jaga ela sampai keton imbinasa-Ku. tuntang jaton ije je manyalamat.

²³Oloh je maluput tarimakasih indu parapah, ie te je mahormat Aku; tuntang akan oloh je manatap jalan kareh imparahang-Ku salamat bara Aku.”