Read Ngaju MASMUR 52 Bible Online

MASMUR 52 - Ngaju bible

MASMUR 52

¹Akan pamimpin koor. Nyanyi auh ajar ain Dawid,

² katika Doëg oloh Edom, dumah mansanan akan Saul je Dawid jari sampai intu human Ahimelekh.

³O oloh abas mbuhen ikau tara-tara dengan kaabasm taharep oloh je inyinta Hatalla?

⁴Hapus andau ikau manipu tuntang marencana taloh je papa; jelam kilau lading cukur je banyihi.

⁵Ikau labih sinta kapapa bara kahalap, labih rajin mananjaro bara hakotak bujur.

⁶Hapan kare auhm ikau manipu tuntang mangapehe atei oloh!

⁷Tapi ikau kareh imbinasa Hatalla katatahie; ikau inyingkap tuntang iihir bara humam, tuntang inganan bara lewun oloh belom.

⁸Awi mite jete, oloh barasih kareh mikeh, palus manatawe ikau tuntang hamauh,

⁹“Jete oloe je dia bakalindong dengan Hatalla, tapi harap dengan panataue je malabien karee tuntang manggau kadamai intu ramo rampasae.”

¹⁰Tapi aku kilau batang saitun je bahijau intu huang Huma Hatalla. Aku percaya je Hatalla tetep sinta sampai katatahie.

¹¹Aku harajur nahuang manarimakasih intu Ikau intu taharep ungkup Ayum imbritaku kataun Aim.