Read Ngaju MASMUR 55 Bible Online

MASMUR 55 - Ngaju bible

MASMUR 55

¹Akan pamimpin koor. Tuntang impahayak awi kacapi. Nyanyi auh ajar ain Dawid.

²O Hatalla, hining auh lakudoangku, ela mules bara palakungku.

³Ite aku, tuntang nombah auhku, aku hancor awi kasusahku.

⁴Ateiku balisah awi ancaman musoh tuntang inindas awi oloh papa. Awi ewen manyusah pambelomku, tuntang hapan kasangit mamusoh aku.

⁵Ateiku paham balisah, kikeh pampatei mangambe bitingku.

⁶Aku inaripi katarewen tuntang kikeh, intakan awi angat bakaike-ikeh.

⁷Jaka aku hapalapas kilau burong dara, aku kareh manggau eka je sanai.

⁸Yoh, aku kareh tarawang kejau toto, tuntang melai intu padang pasir.

⁹Aku kareh mangajeng arepku manggau eka bakalindong, bara riwut barat.

¹⁰O TUHAN, keleh mambingung kare musohku, keleh mangacau pander ewen awi intu kota gitangku aton kakaras tuntang kalahi.

¹¹Handau mahalem ewen bakaliling, malalus kapapa tuntang mampalembut kaderoh.

¹²Intu hete-hete aton gawi mampahancor; gawi manindas gawi manipu sabak intu pasar.

¹³Jaka ih musoh je mamapa aku, aku magon olih manyarenan. Jaka ih musoh je manawah aku, aku magon tau manyahokan bara ie.

¹⁴Tapi toh ikau, kawalku, sobatku, kawal tokepku je mandarhaka mawi aku.

¹⁵Bihin itah hinje dengan kajenta, tuntang patoh sombayang haya-hayak intu Human TUHAN.

¹⁶Nauhe musohku matei manyalenga tuntang belo-belom mohon akan lewun oloh matei. awi kapapa aton intu human ewen, intu bentok ewen.

¹⁷Tapi aku mantehau Hatalla, TUHAN kareh manyalamat aku.

¹⁸Handau hamalem aku bakotok tuntang manangis, tuntang Ie mahining auhku.

¹⁹Ie maliwus aku bara musoh je manyarang je belo-belom malawan aku.

²⁰Hatalla je marentah bara katatahie kareh mahining auhku tuntang mampakalah ewen. Awi ewen dia maku hobah, tuntang dia mikeh dengan Hatalla.

²¹Oloh je puji jadi kawalku manyarang kare kawale, ie malanggar janjie.

²²Kare auhe bahalap, tapi huang ateie aton kasingi. Pandere balemo sanai, tapi manimben kilau padang je banyihi.

²³Sarah kagugup kakenang ateim akan TUHAN, maka Ie kareh manyangga ikau; awi oloh bujur ateie dia inalua impakalah.

²⁴Tapi Ikau, o Hatalla, kareh manamean ewen akan rumbak je paling handalem. Kare oloh panipu tuntang panusoh daha dia kareh manyampai saparo umur ewen. Tapi aku percaya intu Ikau.